Б.Содномдаржаа, Т.Чимгээ нарыг эрүүдэн шүүсэн гэгдэх О.Бархасбадийн шүүх хурал энэ сарын 11-нд болохоор зарласан. Гэвч түүний шүүх хурал дахин  тодорхойгүй хугацаагаар хойшилсон. Түүний хэрэг удаа дараа хойшилж байгаад Т.Чимгээгийн ах Т.Хүрэлбат ямар байр суурьтай байгааг тодрууллаа.

     Тэрбээр “Бид Төв аймгийн шүүхээс татгалзаж, Дээд шүүхэд хандах бодолтой байна. Төв аймгийн Отгонжаргал гэх шүүгч О.Бархасбадийн хэргийг хоёр жил шүүж чадсангүй. Ямар нэгэн байдлаар заавал хойшлуулдаг. Монголын шүүх үнэхээр дампуу байна. Б.Содномдаржаа болон түүний ар гэрийнхэн өнгөрсөн хоёр жилийн хугацаанд шүүх хуралд оролцохоор Эрдэнэтээс ирээд буцдаг ажилтай боллоо. Миний ойлгосноор О.Бархасбадийн хэрэг Өршөөлийн хуульд багтчихсан юм шиг байна лээ. Хэдэн жилийн ял авлаа гэхэд Өршөөлийн хуулиар суллагдана гэсэн үг. Тэгэхээр О.Бархасбадь шоронд орохгүй. Түүнд айх зүйл байхгүй. Харин яагаад шүүх хурал нь болохгүй байна вэ гэхээр дахин энэ хэргийг гаргаж ирэх сонирхолтой байгаа гэж хардаж байна” гэв.