Монгол улсын ардын уран зохиолч, Соёлын гавьяат зүтгэлтэн, яруу найрагч Шагдарын Дулмаагийн 90 насны ойд зориулсан “Хаан найргийн хатан Дулмаа” сэдэвт эрдэм шинжилгээний хурал 2022 оны тавдугаар сарын 13-ны өдөр болно. Тус хурлыг Монголын зохиолчдын эвлэл, Монгол Улсын Үндэсний номын сан, Хэл зохиолын хүрээлэн, Төв аймгийн ИТХ, ЗДТГ, Төв аймгийн нутгийн зөвлөл, Баян сумын ИТХ, ЗДТГ, Монгол Улсын их сургууль, Боловсролын их сургууль, Улаанбаатарын Их сургууль, Утга зохиол, нийгмийн ажилтны дээд сургууль зэрэг олон байгууллага хамтран зохион байгуулж байна. 

 

 

 Хуралд Улсын Их хурлын гишүүн, Болор цомын эзэн, яруу найрагч Г.Мөнхцэцэг, Төв аймгийн ИТХ-ын дарга Ц.Жамбалсүрэн, Төв аймгийн Нутгийн зөвлөлийн дарга Су.Батболд, Хэл зохиолын хүрээлэнгийн захирал, доктор, профессор Ж.Бат-Ирээдүй, Монголын Эмэгтэйчүүдийн холбооны ерөнхийлөгч Б.Оюунгэрэл, Ардын уран зохиолч, Төрийн шагналт, Соёлын гавьяат зүтгэлтэн, яруу найрагч П.Бадарч нар мэндчилгээ дэвшүүлнэ. ШУ-ын гавьяат зүтгэлтэн, доктор (Ph.D), дэд профессор Д.Сумъяа “Монгол яруу найргийн хатан хаан Ш.Дулмаагийн ная шахам жилийн сайхнаас сайхны үүдсэн туурвилын тойм” сэдвээр үндсэн илтгэлийг хэлэлцүүлэх аж.