Увс аймгийн Улаангом сумын ерөнхий боловсролын Цогцолбор нэгдүгээр сургуулийн дөрөвдүгээр ангийн  сурагчид байрны гадаах сүүдрэвчинд орхисон байсан зөөврийн компьютер, гар утасны цэнэглэгч зэргийг Цагдаагийн байгууллагад хүлээлгэн өгсөн мэдээлэл цахим хуудаст нийтлэгдсэн. Тэдгээр тусч, шударга хөвгүүдийн нэг  Н.Түвшинбаяртай утсаар холбогдож, сэтгэгдлийг нь сонссон юм.

-Сайн уу, хичээл сурлага нь өндөр үү. Чамайг найзуудтайгаа бусдын санаандгүй гээсэн зүйлсийг олоод, цагдаагийн байгууллагад шууд хүлээлгэн өгсөн баатарлаг бөгөөд сайн үйлс хийсэн учраас чамд уншигчдынхаа өмнөөс баяр хүргэхээр холбогдож байгаа юм аа. Тэр үед юу болсон тухай ярьж өгөөч?

        -Аан, тэр өдөр бид хичээл тарсны дараа найзынхаа гэрт тоглох гэж яваад байрных нь урд саравчинд ортол цүнхтэй юм байсан. Нээгээд үзтэл зөөврийн компьютер харагдсан. Нээж үзчихээд бид айсан. 

-Яагаад айсан юм бэ?

         -Мэдэхгүй ээ, цаанаасаа л яагаад байгаагаа мэдэхгүй айгаад байсан.

-Цагдаагийн газарт хүргэж өгөх санааг хэн нь гаргасан бэ?

       -Найзуудтайгаа "Цагдаагийн газар хүргэж өгөх нь хамгийн зөв шийдвэр" гэж ярилцсан. Айж байсан ч найзуудтайгаа “Бид чинь жинхэнэ эр хүмүүс шүү дээ” гэж нэгнээ зоригжуулсан.

-Цагдаа нар та нарыг хэрхэн хүлээж авсан бэ?

        -Тэнд байсан цагдаа нар биднийг “Их мундаг, сайхан сэтгэлтэй хүүхдүүд байна” гэж магтсан. Нэг цагдаа эгч гар утсаараа бидний зургийг авч, цахим орчинд энэ талаарх мэдээллийг оруулсан байсан. Цагдаа ах нар магтсаны дараа айж, зугтаалгүй тэр цүнхтэй зүйлсийг аваачиж өгсөндөө бид баярлаж, сэтгэл санаа сайхан болсон. Бас бидэнд биш, эзэндээ хамгийн их хэрэгтэй компьютерийг нь олж өгсөндөө бид баяртай байгаа. Ялангуяа компьютер дотор нь байгаа зүйлс маш их үнэ цэнтэй байх нь ойлгомжтой гэж бид ярилцсан.

-Цахим хуудаст та нарын хийсэн сайн үйлсийн талаарх мэдээлэл, зураг орсныг гэр бүл, ангийнхан нь мэдээд, хэрхэн хүлээж авсан бэ?

       -Манай ангийн найзууд, гэр бүлийнхэн “Сайн байна, зөв зүйл хийсэн байна. Мундаг” гэж магтсан. Бас биднийг цахим орчинд ч гэсэн их магтсан гэсэн. Тэр хүмүүст бүгдэд нь баярлалаа гэж хэлмээр байна. Биднийг Улаангом сумын Засаг дарга Ц.Пүрэвжав өрөөндөө хүлээн авч уулзсан. Тэгээд мундаг сайн хүүхдүүд гээд бидэнд бэлэг өгсөн. Гоё монгол тоглоом, чихэртэй бэлэг бас тус тусад нь 10.000 төгрөг өгсөн. Мөнгөөрөө "Өөртөө хэрэгтэй зүйлээ аваарай" гэсэн.

-Том болоод ямар мэргэжилтэй болох вэ?

       -Би том болоод цагдаа болохоор шийдсэн. Хүмүүсийн хаясан, гээсэн эд зүйлсийг олж өгмөөр байна. Гээсэн эд зүйлээ авахдаа эзэд нь их баярлах нь ойлгомжтой шүү дээ. Бас хууль бус зүйлстэй тэмцэж, шударга ёс бий болгох хүмүүсийн нэг байхыг хүсэж байна. 

-Чамд болон найзуудад нь сурлагын өндөр амжилт хүсье. Бас олон сайн үйлсийн эзэн болоорой. 

         -Баярлалаа.