"ТОП ДОНОР" Д.БУМ-ЭРДЭНИЙГ УЛААНБААТАР ХОТ РУУ ТЭЭВЭРЛЭЖЭЭ

2022-05-10, 496

Бусдын амь насыг аврах үйлсэд өөрийн 287 литр цусаа бэлэглэж, 800 гаруй хүний амь насыг аварсан Монголын Топ донор Д. Бум-Эрдэнэ нь 2022 оны тавдугаар сарын 07-ны өдөр Хөвсгөл аймгийн Хатгал тосгонд ажил үүргээ гүйцэтгэж байгаад авто осолд орж эмнэлэгт хүргэгдсэн. Мэдээгүй жүүлэг эрчимт эмчилгээний тасагт сэхээн амьдруулах тусламжийг цаг алдалгүй үзүүлсэн хэдий ч өвчтөний биеийн байдал хүнд, яаралтай Гэмтэл согог судлалын үндэсний төвд агаараар тээвэрлэх шаардлага гарсан тул аймгийн Нэгдсэн эмнэлгийн удирдлагууд болон эмчлэгч эмч нар аймгийн ИТХ-ын дарга Г.Мөнгөнхуяг, аймгийн Засаг дарга Ш.Идэрбаясгалан нарт хүсэлт хүргүүлсэн.

Аймгийн удирдлагууд уг хүсэлтийг шуурхай шийдвэрлэн, Улсын Онцгой комиссд агаараар тээвэрлэх шуурхай багийг орон нутагт ирүүлэх захиалга өгч, өвчтөнийг Улсын Онцгой комиссын даргын шийдвэрээр үнэ төлбөргүй яаралтай тээвэрлэж, иргэнд амь тэнссэн үеийн эмнэлгийн тусламж авах боломжийг бүрдүүллээ.

2022 он гарсаар Улаанбаатар хот руу шатлалын эмнэлэгт хүргэгдэх шаардлагатай дөрвөн хүнд өвчтөнийг ар гэрийн болон орон нутгийн санхүүжилтээр агаараар тээвэрлэж тэдний амь насыг аварсан. Цаашид орон нутгийн зүгээс Иргэний нисэхийн Ерөнхий газартай гэрээ байгуулж хүнд өвчтөнийг үнэ төлбөргүй болон хөнгөлөлттэй нөхцөлөөр агаараар тээвэрлэх асуудлыг шийдвэрлэхээр ажиллаж байна. Энэхүү арга хэмжээг хамтран шуурхай зохион байгуулсан аймгийн удирдлагууд, Улсын Онцгой комисс, аймгийн Онцгой байдлын газар, Эрүүл мэндийн газар, Нэгдсэн эмнэлгийн хамт олонд Д.Бум-Эрдэнийн гэр бүлийн зүгээс талархал илэрхийллээ.

"ТОП ДОНОР" Д.БУМ-ЭРДЭНИЙГ УЛААНБААТАР ХОТ РУУ ТЭЭВЭРЛЭЖЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.