СТА, жүжигчин Ч.Ундрал Соёлын сайдын тушаалаар Кино урлагийн зөвлөлийн даргаар томилогджээ. Тодруулбал, Кино урлагийн үндэсний зөвлөлийн долоон гишүүнийг нээлттэй сонгон шалгаруулалтад орох хүсэлтийг дөрөвдүгээр сарын 27-ныг хүртэл хүлээн авч, дууссан байна. 

    Харин хуулиараа Зөвлөлийн дарга нь төрийн албан хаагч байх бөгөөд түүнийг Төрийн албаны тухай хуульд заасны дагуу сонгон шалгаруулж, соёлын асуудал эрхэлсэн Засгийн газрын гишүүн томилж, чөлөөлнө гэж заасан байдаг. Ингэснээр кино урлагийг дэмжих сан байгуулж, санхүүжилтийг дээр дурдсан зөвлөл шийдэх юм. Тэгэхээр Монголын киночид кино уран бүтээлээ Кино урлагийн үндэсний зөвлөлийн 11 гишүүнээр “шалгуулж” эрхээ авна гэсэн үг. Уг ажлын хэсэгт киноны салбараас Монголын урлагийн зөвлөлийн удирдах зөвлөлийн гишүүн Ц.Ариунаа, “Боролдой” студийн захирал С.Мягмар, "ST" студийн захирал Б.Амарсанаа, "Монголын кино бүтээгчдийн холбоо” ТББ-ын тэргүүн Ж.Сэнгэдорж, “Аримун” продакшны продюсер, жүжигчин Д.Ганцэцэг, “Сэмүүн” студийн найруулагч Б.Баяр, “Хүмүүн фильм” студийн найруулагч Д.Мөнхсүх, кино эдийн засагч, эрх зүйч багш Г.Энхбаяр, "IFI" продакшны продюсер С.Уран, кино зохиолч, найруулагч А. Миеэгомбо зэрэг10 хүн ажилласан байдаг. Тэгвэл Кино урлагийн зөвлөлийн даргаар шинээр томилогдсон Ч.Ундрал гэж хэн болохыг уншигч та бүхэнд танилцуулъя.

Ч.УНДРАЛ ГЭЖ ХЭН БЭ

     СТА Ч.Ундрал 1982 онд төржээ. Тэрбээр соёл урлагийн салбарт жүжигчин, дуучин, хөтлөгчөөр ажиллаж байгаад “Херо” интертайментын студид продюссер, УДЭТ-ын маркетингийн даргаар ажиллаж байжээ. Тэрбээр “Гурван долоо хоног”, “Тавилан”, “Би чамд хайртай-2”, “Луйвар”, “Тэртээх ертөнцийн хөгжимчин”, “Урилга”, “Татаар ажиллагаа”, “Ээжээ надтай гэрлээч”, “Эмэгтэй” зэрэг киноны гол, туслах дүрийг бүтээж байжээ. Харин тэрбээр Өөдөөтэй хамтран дуулснаар дуучин болох гараагаа эхлүүлж олныг шуугиулж байсан гэдэг. 

    Дашрамд дурдахад, Ч.Ундрал “Херо” интертайментын захирал Б.Баатартай гэр бүл болж, хүүтэй болсон гэдэг. Харин тэдний хувийн амьдрал бүтээгүй тул хүүтэйгээ гадаад олон жил амьдарсан гэдэг.