Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө тусгаар тогтнолоо сэргээн мандуулсны 110 жил, Ардын хувьсгалын 100 жил, Орчин цагийн боловсролын салбар үүсэж хөгжсөний 100 жилийн ойг тохиолдуулан Ерөнхийлөгч У.Хүрэлсүх зарлиг гаргаж, шинжлэх ухаан, боловсролын салбарт олон жил ажиллаж, үнэмлэхүй хувь нэмэр оруулсан эрхмүүдэд төрийн дээд одон медаль гардуулсан юм.

     Энэ үеэр Хэнтий аймгийн Биндэр сумын Ерөнхий боловсролын сургуулийн ахмад багш Г.Цэгмидтэй уулзаж, баярын сэтгэгдлийг нь хуваалцсан юм. Тэрбээр “Гавьяат багш гэх эрхэм хүндтэй шагнал хүртсэндээ туйлын баяртай байна. Нутгийн зон олон, шавь нар, үе үеийн шавь нар, үр хүүхэд, ач, зээ нар болоод миний баярыг хуваалцаж байгаа бүх хүнд баярлалаа. Багш гэдэг нарт ертөнцөд байхгүй нандин сайхан мэргэжил юм гэдгийг биеэрээ үзэж, туулсан. Залуу багш нартаа захиж хэлэхэд, “Хүүхэд, эцэг эхчүүдтэй чин сэтгэлээсээ хандаж байгаарай” гэж хүсэх байна. Бидний үед гэр орондоо бүрэн анхаарч чадахгүй хүүхдүүдээ ээждээ үлдээчихээд ажилдаа зүтгэдэг байсан. Тэгж зүтгэсний хүчинд шавь нар минь сайхан амьдарч, амжилттай яваа. Тэднийхээ сайхан явааг харах, сонсох бүрд сэтгэлийн хүч тэнхээ, урам зориг ордог.

   Би Хэнтий аймгийн Биндэр сумын долоон жилийн сургуульд 16 настайгаасаа хойш 40-өөд жил багшаар ажилласан. Багш хүнийг бүх шавь нь эргэж, дурсаж, баярлуулж байдаг юм. Багш хүн шиг сэтгэлээр баян хүн байхгүй” гэлээ.