“Токио-2020” паралимпын хүндийг өргөлтийн -107 кг жинд шинэ рекорд тогтоож, аварга болсон Э.Содномпилжээг өнөөдөр Хөдөлмөрийн баатар цол, тэмдгээр шагнаж, урамшууллаа.

    Тэрбээр шагнал гардуулах ёслолын үеэр баярын сэтгэгдлээ хуваалцахдаа “Хөдөлмөрийн баатар цол хүртсэндээ сэтгэл өндөр байна. Энэ шагнал надад маш их үүрэг, хариуцлага хүлээлгэж байна.Тийм учраас монголын ард түмнийхээ итгэл, сэтгэлийг алдахгүй монгол хүн, Монгол Улсаа дэлхийд таниулахын тулд дараа дараагийн тэмцээнд улам сайн хичээж оролцох болно. Намайг дэмжиж байгаа монголын бүх ард түмэндээ баярлалаа. Би энэ сарын 25-нд Гүржид болох Дэлхийн аварга шалгаруулах тэмцээнд явна. Түүндээ амжилттай оролцож, рекордоо ахиулахын тулд хичээнэ” гэлээ.