Хөвсгөл аймгийн Цагааннуур сумын Тэнгис гэх газар Шишгэд голын мөс цөмөрч нэг автомашин живжээ. Тус аймгийн Онцгой байдлын газар, Цагдаагийн газрын алба хаагчид, орон нутгийн иргэд өчигдөр 13:55 цагаас эхлэн “УАЗ Пургон 37419” загварын автомашинаар зорчиж явсан иргэн Б, 58 настай эрэгтэй, Б ,39 настай эмэгтэй нарыг Шишгэд голын уснаас эрэн хайх ажиллагааг зохион байгуулсан байна.

    Мөн өдрийн 14:50 цагт голын эргээс 45 метр зайд, таван метрийн гүнээс Б 39 настай, эмэгтэйгийн цогцсыг олж гаргасан. Шишгэд голын усанд гурван метрийн зайтай, зургаан метрийн гүн 15 цооног гарган, 21 удаа шумбалт хийсэн боловч үр дүнд хүрээгүй тул түр зогсоосон байна. Өнөөдөр эрлийн ажиллагааг дахин эхлүүлжээ.