Эргэлт.мн мэдээллийн сайт “Дотуур байранд амьдардаг хүүхдүүдийн эрх зөрчигддөг үү” сэдэвт хэлэлцүүлэг зохион байгуулж байна. Уг хэлэлцүүлэгт Боловсрол, шинжлэх ухааны яам, Хөдөлмөр, нийгмийн хамгааллын яам, Хүний эрхийн Үндэсний Комисс болон төрийн бус байгууллагуудын төлөөлөл оролцож байна.

Энэ үеэр хуульч Р.Булгамаа "Боловсролын салбарынхан хүүхдийн асуудалд анхаарал хандуулах хэрэгтэй. Тэр дундаа дотуур байрны хяналт, шалгалтыг чангатгах хэрэгтэй. Өнөөдөр сургууль болон дотуур байранд хүүхдийг сонсох, хүүхдийг гэмт хэргээс урьдчилан сэргийлэх хүрээнд ямар ажил хийгдсэн, хэд нь эрүүл мэндийн асуудал, хүнс тэжээлийн дутагдалдалд орсон талаарх бодит мэдээлэл байхгүй. Энэ дагуу бодит нөхцөл байдалтай очиж танилцах хэрэгтэй.  Мөн 35 мянган хүүхэдтэйгээ ажиллая.

Эдгээр хүүхдүүддээ аюулгүйн зэргийн үнэлгээ хиймээр байна. Ялангуяа, дотуур байрны багш, жижүүрийн боловсролын асуудалд анхаарал хандуулах хэрэгтэй. Дотуур байрны ажилтан хүүхдийн өмнө хүлээх үүргээ мэдэж байгаа эсэхийг шалгах хэрэгтэй. Мэдэхгүй бол энэ дагуу гарын авлага тараах нь чухал. Мөн хүүхдэд асуудал тулгарвал хаана хандах вэ гэдэг мэдлэг мэдээллийг өгөх ажлыг улсын хэмжээнд зохион байгуулах хэрэгтэй" гэв.