Эргэлт.мн мэдээллийн сайт “Дотуур байранд амьдардаг хүүхдүүдийн эрх зөрчигддөг үү” сэдэвт хэлэлцүүлэг зохион байгуулж байна. Уг хэлэлцүүлэгт Боловсрол шинжлэх ухааны яам, Хөдөлмөр, нийгмийн хамгааллын яам, Хүний эрхийн Үндэсний комисс болон “Охидын түүх” ТББ, хуульч Р.Булгамаа, сэтгэл зүйч М.Далайцэрэн тэргүүтэй төлөөллүүд оролцож байна.

         Эргэлт.мн мэдээллийн сайтын сурвалжлах баг Өвөрхангай аймгийн Зүүнбаян-Улаан суманд өнгөрсөн долоо хоногт ажиллаж, тус сумын сургуулийн дотуур байранд амьдарч байсан 17 настай О гэх охин бусдад буудуулж нас барсан хэргийг сурвалжлаад ирсэн. Талийгаач охин амиа алдахаасаа өмнө О.Банди гэгчид удаа дараа дарамтлуулж, бэлгийн хүчирхийлэлд өртөж байсан, энэ тухайгаа дотуур байрныхаа багш, жижүүр, ангийн багш, сургуулийнхаа захиралд мэдэгдсэн ч тэд ямар ч хамгаалах арга хэмжээ аваагүй, харин ч эсрэгээрээ доог, тохуу хийж байсан тухай бодит мэдээллийг орон нутгийнхан болон сурагч, сургуулийнхан өгч байгаа юм.

         Иймд Монгол Улсын хэмжээнд үйл ажиллагаа явуулж буй 600 гаруй дотуур байранд хүүхдийн эсрэг хүчирхийлэл байнга үйлдэгддэг юм биш биз дээ, харж хамгаалах ёстой багш, сурган хүмүүжүүлэгчид, жижүүр, нийгмийн ажилтнууд нь тэднийг ялгарлан гадуурхаж, дээрэнгүй харилцдаг, итгэж ярьсан асуудлыг нь доог тохуу, амны зугаа болгодог байдлыг яаж засах вэ, тэнд хүүхдийн эрхийг ямар байдлаар зөрчиж байна вэ, үүнээс болж хэчнээн хүүхэд бие, сэтгэл болоод амиараа хохироод байна вэ, бид хамтран ямар алхам хийж байж дотуур байранд амьдарч байгаа хүүхдүүдийн эрхийг хамгаалж чадах вэ гэсэн асуултын эрэлд гараад байна. Тиймээс бодлогын   яам болоод мэргэжлийн төрийн бус байгууллага, судлаач, хуульч, сэтгэл зүйчидтэй хамтран гарц шийдэл хайх зорилгоор энэхүү хэлэлцүүлгийг зохион байгуулж байна. Хэлэлцүүлгийн үеэр гарсан саналуудыг нэгтгэн БШУЯ, НХХЯ тэргүүтэй шийдвэр гаргах түвшний яамд, нэр бүхий сайд нарт хүргүүлж, шийдэлд хүрэх гарцыг хамтдаа хайхыг зорьж байна.