Ядамжав овогтой Дамдинпүрэв нь Баянхонгор аймгийн Гурванбулаг суманд 1932 онд төржээ. Тэрээр улсад бага наснаасаа эхлэн 50 жил ажилласан тэргүүний ажилтан бөгөөд 1942-1959 онд Баянхонгор аймгийн Гурванбулаг суманд Крилл бичгийн багш, Багийн дарга, Хүний бага эмчийн салбарын эрхлэгчийн ажлыг хийж байлаа. Хүн амыг бичигтэн болгох төр засгийн шийдвэрийг биелүүлэхэд 500 гаруй хүний бичигтэн болгож, ард иргэдийг эрүүлжүүлэх, арьс өнгөний халдварт өвчний голомтыг устгахад бодитой хувь нэмэр оруулж үр бүтээлтэй ажилласан юм. Мөн энэ хугацаанд 300 гаруй хүүхдийг эх барьж байжээ.

     1959-1961 онд Улаанбаатар хотын худалдааны 12 дугаар дэлгүүр, 1961-1991 онд УБТЗ-ын худалдааны зургадугаар дэлгүүр, нэг, дөрөв, зургадугаар контор, нийтийн хоолны секторын дарга зэрэг ажлыг нэр төртэйгөөр хийж байжээ. Я.Дамдинпүрэвийн удирдсан дээрх байгууллагуудын ажил нь жил бүрийн ажлын дүнгээр 30 жилийн хугацааны 28 жилд нь тус салбарт эхний нэг, хоёрдугаар байруудыг эзэлж, тав, зургаа, долоо, наймдугаар таван жилийн төлөвлөгөөт эдийн засгийн чанарын бүх үзүүлэлтийг 132-137 хувиар жил дараалуулан биелүүлж 20 жилд 25 гаруй жилийн ажлыг хийж байсан аж.

     Я.Дамдинпүрэв нь бага наснаасаа төвд хэл үзэж, зурхайн ухаанд шамдан суралцсан удам дамжсан зурхайч бөгөөд зурхайн ухаанаа төгөлдөржүүлэн дэлгэрүүлж, олон хүнд зурхайн судлалын үндэс суурийг зааж сургасан ачтан юм. Мөн жил бүрийн өөрийн цаг тооны бичгийг хэвлүүлэн гаргадаг байсан нь олны хүсэн хүлээдэг цагалбар болж чаджээ. Түүний Монголын зурхайн судлалд оруулсан хувь нэмрийг өндрөөр үнэлж, Монголын зурхайн академиас “Зууны манлай зурхайч”-аар өргөмжлөн алдаршуулсан байдаг. Я.Дамдинпүрэв нь Буддын шашны хөлгөн судрууд болон хэдэн мянган номыг цээжээр мэддэг, олон мянган хүнд ерөөл буянаа хайрласан энгүй их буянтан байлаа.Таны минь цаглашгүй их ухаан, гэгээн дүр төрх бидний сэтгэл зүрхэнд үүрд хоногшин дурсах болно.

УМ САЙН АМГАЛАН БОЛТУГАЙ.