Ойн салбарын Үндэсний чуулган ирэх даваа гарагт эхлэх аж. Тус чуулганыг Монгол Улсын Ерөнхийлөгч У.Хүрэлсүхийн ивээл дор Монгол Улсын Ерөнхийлөгчийн Тамгын газар, БОАЖЯ-аас гурван өдөр зохион байгуулна. Чуулганы салбар хуралдаан Байгаль орчны шинжилгээний төвд болох бол Үндсэн чуулган Төрийн ордонд хуралдах юм.

Чуулганаар манай улсад өрнөөд буй тэрбум мод тарих үндэсний хөдөлгөөний эхлэл, явцын талаар мөн хэлэлцэж, хэрэгжүүлэх арга зам, шийдлийн талаар ярилцах аж.

Ташрамд дурдахад, манай улсад Уур амьсгалын өөрчлөлт, цөлжилтийг бууруулах Үндэсний хороо байгуулжээ. Тус хороо нь НҮБ-ын Уур амьсгалын өөрчлөлтийн тухай Суурь конвенцын Парисын хэлэлцээр, Цөлжилттэй тэмцэх конвенцоор хүлээсэн үүрэг болон “Тэрбум мод” үндэсний хөдөлгөөнийг улсын хэмжээнд хэрэгжүүлэх ажлыг зохион байгуулж хянах юм. Мөн цөлжилт, газрын доройтлыг бууруулах ажлын салбар дундын уялдааг хангаж зохицуулан ажиллах Үндэсний хороог Монгол Улсын Ерөнхий сайд Л.Оюун-Эрдэнэ ахлах аж.