Монгол Улсын Ерөнхий сайд Л.Оюун-Эрдэнэ өнөөдөр Соёлын бүтээлч үйлдвэрлэгчдийн нэгдсэн үзэсгэлэнтэй танилцаж, жижиг дунд үйлдвэрлэл, үйлчилгээ эрхлэгчдийн төлөөлөлтэй уулзлаа. Энэ үеэр Ерөнхий сайд Л.Оюун-Эрдэнэ иргэдийг дархлаа сэргээх нэмэлт тундаа хамрагдахыг уриалсан байна.

Тэрбээр “Арваннэгдүгээр сарын 1-ээс соёл урлаг, спортын үзвэр үйлчилгээг танхимын 50 хувийн дүүргэлттэй нээсэн. Бид нэмэлт гуравдугаар тунгийн хамрагдалт 50 хувьд хүрвэл  өндөржүүлсэн бэлэн байдлын “Улбар шар” түвшнээс “Шар” түвшин рүү шилжүүлэх стратеги барьж байна. Дэлхий даяар цар тахлын дельта хувилбараас сэргийлэхийн тулд вакцины гуравдугаар тунг тарих нь үр дүнтэй гэсэн дүгнэлт хийж, 30 гаруй улс хүн амаа нэмэлт тунд хамруулж эхэлсэн. Засгийн газраас иргэдийг гуравдугаар тунд хамруулах ажилд бүх төрлийн дэмжлэг үзүүлнэ. Иргэд гуравдугаар тундаа идэвхтэй хамрагдаж, цар тахлын эрсдэлээс өөрийгөө болон бусдыг хамгаалж, хөл хориогүй, энгийн амьдрал руу үе шаттай шилжихийг уриалж байна” гэжээ.