Энэ сард цасан шуурга шуурч, цочир хүйтэрнэ гэж Цаг уур орчны шинжилгээний газраас анхааруулаад буй.  Энэ талаар Цаг уур, орчны шинжилгээний газрын мэргэжилтнээс тодрууллаа.

-ЗАВХАН, БАЯН-ӨЛГИЙ, ХОВД АЙМГААР ЦАС ОРЖ, ЭРС ХҮЙТРЭХ ТӨЛӨВТЭЙ БАЙНА-

-Энэ сард цасан шуурга шуурч эрс хүйтэрнэ гэсэн. Урьдчилсан төлөв байдлаар энэ жилийн цаг агаарын нөхцөл байдал олон жилийн дундажтай харьцуулахад ямар байгаа вэ?

-Энэ жилийн хувьд гаргасан цаг агаарын урьдчилсан төлвөөр дундаж температур олон жилийн дунджаас дулаан байна. Өнгөрсөн жил аравдугаар сарын дунд үеэс хүйтэрч  эхэлсэн бол энэ жилийн тухайд харьцангуй дулаан байна. Энэ сарын эхний арван хоногт агаарын температур өнгөрсөн жилийн өмнөх үеэсээ 3-8 хэмээр хүйтрэх бөгөөд олон жилийн дунджаас бага хур тунадас орох төлөвтэй байна.

-Аль бүс нутгаар илүүтэй хүйтрэх төлөвтэй байна вэ?

-Сарын ихээр ихэвчлэн баруун бүс буюу Завхан, Баян-Өлгий, Ховд зэрэг  аймгаар цас, орж, эрс хүйтрэх төлөвтэй байна. Ихэвчлэн баруун бүсийн нутгаар түрүүлж хүйтэрдэг учир баруун аймгийн малчид өвлийн бэлтгэлдээ эрт ордог. Төвийнн бүс нутгаар, энэ сарын 5-ны зүүн хагаст цас орж, хүчтэй цасан болон шороон шуурга шуурч, эрс хүйтэрнэ.

-Сарын дунд үед бүс нутгуудад ямар байх вэ?

-Сарын дунд үед хүйтний эрч чангарч, 3-8 градусаар илүү хүйтэрнэ. Мөн сарын эхэн болон дунд, сүүл үеэр ихэнх нутгаар хур тундастай. Бүс нутгийн хувьд баруун аймагт хүйтний эрч чангарах төлөвтэй байгаа бөгөөд төв болон зүүн бүсийн нутгаар дулаан байна. Харин говийн аймгийн нутгаар хүйтрэх төлөв ажиглагдасан.  Хур, тунадас олон жилийн дунджаас бага орох төлөвтэй байна.

-Ойрын өдрүүдийн цаг уурын талаар мэдээлэл өгвөл?

-Энэ сарын 7-ны өдөр хүртэл хүчтэй цасан болон шороон шуурга шуурч, хүйтний эрч чангарах тул иргэд болон малчид цаг агаараас урьдчилан сэргийлэхийг анхааруулж байна.