Ангийн багш нь сурагчийнхаа гэр бүлд башин барьж өгчээ. Тодруулбал, Баян-Өлгий сумын ерөнхий боловсролын нэгдүгээр сургуулийн залуу багш Ж.Нурбек ангийнхаа сурагчийн гэр бүлд хандиваар байшин барьж өгсөн байна.

Ж.Нурбек нь тус сургуульд математикийн багшаар ажилладаг бөгөөд зургадугаар ангийг удирддаг байна. Түүний ангид сурдаг А хэмээх хүүхдийн гэр бүлийн Өлгий сумын дөрөвдүгээр багт байрладаг байшин нь өнгөрсөн зуны сүүлчээр үргэлжлэн орсон борооны улмаас нурсан байна.

Энэ талаар тус хүүхдийн эх олон нийтийн сүлжээнд мэдээлэл тавьж, сургуулиас хол газар бусдын гэрт түр амьдарч байгаа тухайгаа бичиж иргэдээс тусламж хүсжээ.

Үүнийг сонссон багш Ж.Нурбек тухайн иргэний гэрт нь очиж нөхцөл байдалтай танилцаж, дараа нь аавтайгаа хамт цахим орчинд хандивын аян өрнүүлжээ.  Аяны үр дүнд дөрвөн сая төгрөг цугласан бөгөөд зарим тусч хүмүүс нэмж мөнгө хандивласан байна. Ийнхүү  хоёр сарын дараа өрх толгойлсон эхэд зургаан өрөөтэй өвлийн дулаан байшин барьж өгчээ.