Хүйтний улирал эхэлж, үүнтэй зэрэгцээд ханиад, томууны дэгдэлт нэмэгддэг. Сүүлийн үед дүүргийн эмнэлгээр үйлчлүүлэх иргэдийн ачаалал нэлээд нэмэгдэж, эмнэлгийн ор, хүрэлцээгүй болсон байна. Тэр дундаа эмнэлгүүдийн хүүхдийн тасгийн ачаалал ихсэж, хэвтэн эмчлүүлэх ор хүрэлцэхгүй байгаа аж. Энэ дагуу бид Баянзүрх болон Чингэлтэй дүүргийн эмнэлгээр орж, хүүхдийн тасгийн эмч нараас нөхцөл байдлыг тодрууллаа.

Баянзүрх дүүргийн хүүхдийн тасгийн ерөнхий эмч У.Агиймаа: Өдөрт 80-100 хүүхэд хэвтэн эмчлүүлэхээр ирдэг

-Танай эмнэлэгт өдөрт хэчнээн хүүхэд үзүүлэхээр хандаж байна вэ?

-Манайд ажлын таван өдөрт 80-90 хүүхэд хэвтэн эмчлүүлэхээр ирдэг бол амралтын өдөр 100 гаруй хүүхэд эмчлүүлэхээр ирж байна. Ихэвчлэн Өрхийн эмнэлгийн бичигтэй, бие нь хүндэрсэн, хэвтэн эмчлүүлэх шаардлагатай хүүхдүүд ирж хэвтдэг.

-Орны хүрэлцээ хэр байна вэ?

-Харьцангуй гайгүй. Гэхдээ цаашид хүүхдийн ачаалал нэмэгдэж, хэвтэн эмчлүүлэх хүүхэд ихэсвэл орны хүрэлцэхгүй хүндрэлтэй байдал үүсэхээр байгаа. Манай эмнэлгийн хүүхдийн тасаг 24 цагаар ажиллаж байна.

-Эцэг, эхчүүд цар тахлаас сэргийлэн хүүхдээ эмнэлэгт үзүүлэхгүй байснаар хүндрэх тохиолдол гарч байх шиг байна. Энэ тухайд?

-Мэдээж нэг талаараа тийм. Нөгөө талаараа ханиад томууны цаг эхэлж байгаатай холбогдуулан өдийд хүүхдийн ачаалал нэмэгддэг. Иймээс эцэг, эхчүүд хүүхдүүддээ анхаарал, хяналт тавих нь чухал. Ялангуяа, хичээл сургууль орж байгаа энэ үед хүүхдийн дархлаа суларч, амархан ядарч байна.

-Ихэвчлэн хэдээс хэдэн насны хүүхэд өвдөх нь их байна вэ?

-Бага насны хүүхдүүд хатгаа авах, ханиалгах нь элбэг байгаа юм.

Чингэлтэй дүүргийн  хүүхдийн хүлээн авахын эмч Б.Энхтуяа: Өндөр халуурсан, хүндээр ханиалгасан хүүхдүүд их байна

-Хүүхдийн тасгийн ч ачаалал хэр байна вэ. Өдөрт хэчнээн хүүхэд ирж байна вэ?

-Ханиад томууны улирал эхэлж байгаатай холбогдуулан хүүхдийн ачаалал их байна. Манай дүүргийн эмнэлгийн тухайд өдөрт 70-80 хүүхэд үзүүлэхээр ирж байна. Эмч нарын хувьд коронавирусийн голомтод нэмэлт хүчээр ажиллаж байгаа болохоор цөөн байна. Хатгаа авсан, биеийн байдал нь хүнд хүүхдүүдээ аль болох хэвтүүлэх тал дээр анхаарч байгаа.

-Хамгийн сүүлийн тоон мэдээллээр танай эмнэлгийн хүлээн авахаар нийт хэчнээн хүүхэд үйлчлүүлсэн бэ?

-Өчигдрийн байдлаар манай эмнэлгээр 100 гаруй хүүхэд үзүүлснээс 25 нь хэвтэн эмчлүүлэхээр болсон.

-Ихэвчлэн хүүхдэд ямар шинж тэмдэг, зовиур илэрч байна вэ?

-Өндөр халуурсан, ханиалгасан хүүхдүүд их ирж байна. Одоо мөн томуугийн дэгдэлт ихсэх магадлал өндөр байна. Өдийд ер хүүхдийн өвчлөл ихэсдэг. Хүүхдүүдийн уушиг их муу байна. Эцэг эхчүүд томуу, томуу төст өвчнөөс хүүхдүүдээ хамгаалах хэрэгтэй байна.