Малчид өөрийн эзэмшлийн хашаа хороо, өвөлжөөндөө малын тэжээлээ тариалжээ. Тодруулбал, Өвөрхангай аймаг зорилтот жилийнхээ хүрээнд малчид өвөлжөө, хаваржааныхаа дэргэд 1000 м.кв талбайд өвс тэжээл, төмс, хүнсний ногоо тарих боломжийг нээж өгсөн. Үүнтэй холбогдуулан 19 сумын 615 малчин өөрийн эзэмшлийн хашаа хороо, өвөлжөөндөө малын тэжээлээ тариалж, урьдчилсан байдлаар 492 тонн тэжээл хураан авсан байна.

Мөн аймгийн Засаг даргаас сум бүрт атаршсан талбайгаа сэргээж, малын тэжээл тариалах чиглэл өгсний дагуу аймгийн хэмжээнд 5635.8 га талбайд малын тэжээл тариалсан нь урд онтой харьцуулахад 40 хувиар нэмэгдсэн үзүүлэлттэй байна. Урьд нь 2019 онд 730 га-д, 2020 онд 2300 га-д малын тэжээл тариалж байжээ.