Хууль, зүй дотоод хэргийн яам, Цагдаа, дотоодын цэргийн байгууллага хамтран өчигдөр цусаа бэлэглэжээ. Тодруулбал, Монгол Улсад Хууль зүйн салбар байгуулагдсаны 110, орчин цагийн цагдаагийн байгууллага үүсэж хөгжсөний 100 жилийн ой тохиож байгаатай холбогдуулан сайн дурын цус хандивлах үйлсийг олон нийтэд сурталчлан, донорын эгнээг өргөжүүлэх, аюулгүй цусны хангамжийг нэмэгдүүлэх, идэвхжүүлэх, тогтмол хугацаанд цусаа бэлэглэгч доноруудыг алдаршуулах зорилготой цус хандивлах аяныг зохион байгуулсан юм.

Энэхүү арга хэмжээнд Хууль зүй, дотоод хэргийн сайд Х.Нямбаатар, Цагдаа, дотоодын цэргийн идэвхтэн донорууд, алба хаагчид нэгдэж, 150 орчим хүний амь насыг аврах  цусыг сайн дураараа хандивлажээ.

Мөн Цагдаагийн ерөнхий газрын Дотоодын цэргийн 805 дугаар ангийн эргүүлийн офицер, ахмад М.Батдаваа цусаа хандивласан юм. Тэрээр 2006 оноос хойш нийт 42 удаа цусаа өгч “Хүндэт донор” болжээ. Мөн тус ангийн жолооч, ахлах ахлагч Ж.Бат-Эрдэнэ цусаа хандивласан. Ж.Бат-Эрдэнийн хувьд 2015 оноос хойш цусаа хандивлаж байгаа бөгөөд “Идэвхтэн донор” юм. Цус сэлбэлт судлалын үндэсний төв өдөрт 120-150 нэгж цус цуглуулж өдрийн хэрэглээгээ хангадаг учраас сайн дурын донорууд төдийгүй иргэн, аж ахуй нэгж байгууллагатай тогтмол хамтран ажилладаг байна.