МУГЖ С.Жавхлантай холбоотой асуудлаар Цагдаагийн Ерөнхий газрын Хэвлэл мэдээллийн төвийн дарга, цагдаагийн дэд хурандаа Б.Баатархүү өнөөдөр мэдээлэл өглөө. Тэрбээр “Энэ оны аравдугаар сард иргэн Отгонтөгс хэвлэлийн хурал хийж МУГЖ С.Жавхлан, М.Баярмагнай нар “Хамаг Монгол” төслийг хэрэгжүүлнэ гэж Монгол Улсын Засгийн газраас дөрвөн тэрбум төгрөг шантаачилсан гэх гэмт хэргийн шинжтэй мэдээллийг өгсөн.

Дараа нь Цагдаагийн байгууллагад гомдол гаргасан. Гомдлын дагуу Прокурорийн байгууллага харьяалал тогтоож, Эрүүгийн цагдаагийн албанд шалгахаар хүлээлгэн өгсөн. Энэ дагуу тус албанаас хэргийн талаар Сангийн сайд Б.Жавхлан болон гурван гэрчээс мэдүүлэг авсан.

Ингээд бид МУГЖ С.Жавхлан руу энэ сарын 20-21-ны өдрүүдэд 11 удаа залгасан ч аваагүй. Мөн мөрдөгчийн дуудах хуудсыг хоёр удаа өгсөн боловч ирээгүй. Өнөөдөр харин прокурорын дуудах хуудсыг хүргүүлсэн ч мөн хүлээж авсангүй. Хамгийн гол нь бид хуулийн дагуу өөрөө ирээд тайлбар өгөөч гэж байгаа юм. Одоо бидэнд шүүхийн захирамжаар албадан ирүүлэх арга хэмжээ үлдээд байна. Иймээс хуулийн дагуу ирээд, мэдүүлгээ өгөөсэй гэж хүсэж байна” гэв. Мөн тэрбээр сэтгүүлчийн биед халдсан хэргээр гомдол ирсэн тул хуулийн дагуу шалгалтын ажил явагдаж байна гэлээ.