Хөвсгөл аймгийн Рэнчинлхүмбэ сумын нутагт их хэмжээний цас орсны улмаас Хорьдлын давааны зам хаагджээ. Цаг агаарын таагүй нөхцөл байдлын улмаас иргэдэд хохирол учирсан эсэх талаар тус сумын ЗДТГ-ын даргаас тодрууллаа.

       Тэрбээр “Манай сум зургаан багтай. Жил бүр отроор нүүдэг гурван баг бий. Тэд аравдугаар сарын 15-25-ны хооронд нүүдэг. Нүүдлийн цаг болсон энэ үед манай суманд 7-10 хоногийн дотор 0.5-2.5 метр цас орсон. Нүүдлийн гурван багийн малчид байгал, цаг уурын онцлогоос шалтгаалж Хорьдол, Сарьдагын даваа, Жиглэгийн даваа, Утрагын даваагаар давж оторлодог. Түүний нэг  болох Хорьдлын даваа цасанд боогдсон. Хорьдлын давааны таван автомашинтай 40 орчим иргэн хоёр өдөр ухаж, зам гаргасан. Өмнө нь Хорьдлын даваагаар морь, шар зэрэг бүдүүн бод мал хөтөлж, зам гаргадаг байсан. Энэ жил ойрын хэдэн жил ороогүй их цас орсон болохоор иргэдийг олноор дайчилж, хүрз, малтуур, ачаатай автомашинаар зам гаргалаа. Манай сум өвөлжилтийн бэлтгэлээ 90 хувьтай хангасан” гэв.