УИХ-ын чуулганы нэгдсэн хуралдааны үеэр ХХААХҮ-ийн сайд З.Мэндсайхан ургац, хөдөө аж ахуйн салбарын өвөлжилтийн бэлтгэл ажил, малын гоц халдварт өвчин буюу цаг үеийн асуудлаар мэдээлэл өгсөн юм. Тэрбээр "Малын гоц халдварт өвчин энэ жил их байна. Урд өмнө нь гарч байгаагүй үхрийн арьс товруутах өвчин гарлаа. Энэ өвчин манай улсад бүртгэгдэж байгаагүй. Хилээр импортлогдож орж ирсэн гэдгийг хуулийн байгууллагуудтай хамтарч судалсан.  Энэ өвчний тархвар нь чийгшил ихтэй жил ялаа, шумуул, шавжаар дамжиж халдварладаг. Голомтыг нь хумилаа гэсэн ч ялаа, шумуулаар дамжиж өөр газар голомтлох тохиолдол их байсан. ОХУ-аас гаралтай гэж үзэж байгаа. Мөн хонины цэцэг өвчний үүсвэртэй адил гэж эрдэмтэд үзсэн. Тиймээс энэ өвчинд хэрэглэдэг вакциныг 15 дахин нэмэгдүүлсэн тунгаар тарихад боломжтой гэж дүгнэсэн. Энэ дагуу арга хэмжээ авсан. Харин эмчлэх боломжгүй 769 үхрийг устгалд оруулж, 93.4 мянган үхрийг вакцинжуулсан. Одоогоор Дорнод, Сүхбаатар, Хэнтий аймгийн 19 суманд 59 голомт бүртгэгдсэн” гэсэн юм.

      Үхрийн арьс товруутах өвчин Дорнод аймгийн Цагаан-Овоо сумын Хөөвөр багт есдүгээр сарын 12-нд гарсан. Одоогоор халдварын нөхцөл байдал ямар байгаа талаар тус багийн дарга Б.Батзоригооос тодрууллаа. Тэрбээр “Есдүгээр сард Хөөвөр багийн Бэлчир хороолол буюу голын зүүн биед дөрөвдүгээр багийн малчин Э-ийнд үхрийн арьс товруутах өвчин илэрсэн. Тус өвчний шинж тэмдэг нь халуурах, доголох, арьс, туурай нь туурдаг юм билээ. Тухайн үед малын эмч нар шинжилгээ авч аймаг руу явуулсан. Шинжилгээний хариугаар үхрийн  арьс товруутах өвчин гэдэг нь батлагдсан юм. Тухайн үед тэднийхтэй ойр байсан малчдын малыг вакцинжуулсан. Түүнээс хойш дахин халдвар гараагүй байгаа. Юунаас халдвар авсан гэдгийг нь тогтоогоогүй байна” гэв.