Намрын ургац хураалт болон хөдөө аж ахуйн салбарын өвөлжилтийн бэлтгэл хангах ажлын талаар өнөөдөр ХХААХҮЯ-наас танилцууллаа.

Эхлээд 2021 оны ургац хураалтын ажлын талаарх мэдээллийг өгөв.  Энэ жилийн ургацын урьдчилсан балансаар 594 мянган тонн үр тариа, үүнээс 559 мянган тонн улаанбуудай, 198.8 мянган тонн төмс, 117 мянган тонн хүнсний ногоо, 64 мянган тонн тосны ургамал, 203 мянган тонн малын тэжээлийн ургамал тус тус хураан авах боломжтой гэсэн төлөв гарчээ. Ингэхдээ байгалийн давагдашгүй хүчин зүйл болох үргэлжилсэн их бороо, үер, хүчтэй мөндөр, хүйтрэлт, зарим бүс нутагт тохиолдсон нарны хэт халалтын улмаас 12.2 мянган га талбайн ургац болц дутуугаас ногоон тэжээлд шилжиж, 5.3 мянган га талбай ургац ганд өртөж, 1.3 мянга га талбайн ургац мөндөрт цохигдсон бол төмс, хүнсний ногооны 961 га талбайн ургац үерт өртсөн байна.

Өнөөдрийн байдлаар 63 мянган га талбайг ангилан хадаж, 210. мянган га-гаас 310 мянган  тонн үр тариа, үүнээс 293  мянган  тонн улаанбуудай, 15.2 мянган га-гаас 145  мянган тонн төмс, 7.3 мянган га-гаас 92 мянган тонн хүнсний ногоо, 30 мянган га-гаас 86  мянган тонн тэжээлийн ургамал, 30  мянган га-гаас 17 мянган тонн тосны ургамал тус тус хураан авчээ. Ингэснээр үр тарианы хураалт 52.3 хувьтай, төмс, хүнсний ногооны хураалт 76.4-77.3 хувьтай, тэжээлийн болон тосны ургамлын хураалт 30.6 хувийн явцтай байгаа нь өнгөрсөн оны мөн үеэс  найман хувиар ахиу байна. Шинэ ургацаас гурилын үйлдвэрүүд болон Хөдөө аж ахуйг дэмжих санд 90.4 мянган тонн хүнсний буудай нийлүүлэгдээд байна.