“Deaf Cats” хамтлагийн дуучин Ц.Ариунбулгантай уран бүтээлийнх нь талаар ярилцлаа.

-Сайн байна уу. Танай хамтлаг хэрхэн бүрэлдэж, нэгнээ олсон түүхээ хуваалцаач?

-Манай хамтлаг байгуулагдаад удаагүй л дээ. Хамтлаг байгуулагдахаас өмнө хөгжимд сонирхолтой залуус дуртай зүйлээ хийцгээгээд л явдаг байлаа. Манай хамтлаг дөрвөн хүний бүрэлдэхүүнтэй. Хоёр маань өмнө нь өөр хамтлагт байлаа. Нэгнээ урьд нь таньдаг, заримтай нь найз байхад манай басс гитарчин Итгэлт маань биднийг нийлүүлж, “Хамтлаг байгуулъя” гэсэн санал тавьсан. Бид анхнаасаа л блюз тоглож, сэтгэл ханамж авах зорилгоор бүхнээ эхэлж билээ. Блюз л биднийг нэгэн цэгт огтлолцуулсан даа. Бид хамтдаа бэлтгэл хийж, тоглох бүрт маш их баяр баясал мэдэрч, гишүүн бүрийн харцнаас тэр сэтгэл ханамжийг харж болдог. (инээв)

-Танай хамтлаг одоо ямар уран бүтээл дээр ажиллаж байна вэ?

-Бид хэд хэдэн дуутай болж амжсан. Сарын өмнө анхны уран бүтээл болох “Devangels” дуугаа олон нийтэд цацсан. Хөл хорионоос үүдэн хамтлагийн бэлтгэл түр зогссон боловч бие биетэйгээ холбогдон дуунууд сонсож, туршлага солилцож, хөгжилтэй байхыг хичээж байна. Одоохондоо хувь хувьдаа д бэлтгэлээ базааж байна даа. Бүх талаар өөрсдийгөө хөгжүүлэхээр хичээж байна.

Бусад хамтлагийг ямар байдгийг сайн мэдэхгүй ч бид хамт байхдаа зугаатай, үр бүтээлтэй мөн маш тухтай байдгийг хэлж чадна. Хаана ч, ямар ч орчин нөхцөлд тэднээсээ дулаахан бас найдвартай мэдрэмж авдаг даа. Бие биедээ итгэдэг маань бас нөлөөлдөг байх. Олны өмнө гарахад ч тэдэнтэйгээ хамт гэж бодохоор өөрсдийнхөөрөө чөлөөтэй байж, хэн юу гэж бодох нь хамаагүй болчихдог. Мөн бүхий л талын мэдлэгээ солилцож, дан ганц хөгжим ч биш, амьдралын бусад асуудал, зовлон, жаргалаа ч хуваалцдаг нь сайхан санагддаг шүү.

-Дуугаа хэрхэн зохиодог талаар уншигчдад сонирхуулаач?

-Ингэж зохиодог гэсэн тогтсон зүйл байдаггүй. Харин ихэвчлэн тухайн үеийн мэдрэмжээрээ тоглож, нэг үгээр “жам”-ддаг. Бэлтгэл дээр нэг нь хүссэн аяа тоглож байхад нөгөөх нь өөрийнхөөрөө нэмж тоглосоор байгаад дажгүй дуу болчихдог шүү. Үүнийг манайхан ‘Чийдэн асах’ гэлцдэг.

-Цаашдын уран бүтээлийнхээ талаар сонирхуулаач?

-Дээр хэлсэнчлэн бид саяхан нэг бүтээлээ цацсан. Одоо “Slow blues” хэмээх дуугаа бичүүлэхээр бэлдээд байна. Онцлог нь өмнөх бүтээлээс илүү удаан хэмнэлтэй, маш их мэдрэмж илэрхийлсэн байх болов уу. Дуугаа чанаржуулахын тулд одоо ч ажиллаж л байна даа.  

-Хамтлагийн дуунууд тань сонсогчдод их хүрсэн байсан. Баяр хүргэе?

-Баярлалаа. Бидэнд эерэг сэтгэгдэл маш олныг илгээсэн, дууг маань сонссон бүх хүмүүст баярлалаа гэж хэлмээр байна. Блюз хөгжимд хайртай, сонсож таашаал авдаг болохоор тоглох үед бүр ч янзтай байдаг. Тиймээс хүмүүсийг ч бас энэ мэдрэмжийг мэдрээсэй гэж хүссэн. Ташрамд хэлэхэд, блюз бол зовлон дундаас бий болсон аугаа урсгал төдийгүй үүнийг эхлүүлсэн хүмүүст талархаад баршгүй. Блюз хөгжим бүхэлдээ мэдрэмж агуулсан, зовлон зүдгүүр, гуниг гутралыг хуваалцаж, үнэн түүхийг өгүүлдэг мэт санагддаг юм. Бид тоглож, дуулах бүртээ өөрсдийгөө гаргаад ирж буй мэт, дотоод мэдрэмжтэйгээ уялдаж байгаа юм шиг санагддаг шүү.

Тиймээс хүмүүс сонсож байна гэдэг нь бидний мэдрэмжийг мөн адил хуваалцсан гэсэн үг учир гүнээ талархаж байна.

-Хамтлагаа яагаад “Deaf Cats” гэж нэрлэсэн юм бэ?

-Хамтлагаа байгуулчихаад хэсэг нэргүй явсан. Cats нь 1940,50-аад оны жазз блюз тоглож байгаа нөхдүүдийн зүйрлэдэг хипстер хэллэг юм. Мөн блюз, жазз уран бүтээлчид хүндэлдэг хөгжимчдөө “муур” хэмээн зүйрлэдэг. Дээхнэ үед блюз, жазз урсгалын хөгжмийг “Андерграунд” газруудад тоглодог байсан нь надад яг л муур шиг, өдөр нь нуугдаж, шөнө нь гарч ирж байгаа мэт, сонсоход хүртэл зөөлөн, заримдаа учир нь олдохгүй мууртай адил мэдрэмж өгдөг шиг санагдсанаас ийн нэрлэсэн.

 “Deaf” буюу дүлий гэдэг нь бид чихээрээ сонсож ойлгодог юм шиг хэрнээ сэтгэлдээ сонсож бүтээл гаргадаг юм шиг мэдрэгддэг. Харин чихээрээ гаднаас ирэх сөрөг болон эерэг зүйлсийг яг л дүлий мэт өнгөрөөх гэсэн далд утга бодож өгсөн юм. Гол нь гаднаас биш дотроосоо л сонсдог гэсэн утгаар нэрийдсэн юм. Гаднаас юмсыг хэчнээн сонсож хүртэж байсан ч дотор эгшиглэж байгаа аялгуу л хөгжимчин, дуучдыг бий болгодог гэж боддог.