-Улаанбаатар хотод геодезийн 360 орчим нарийн цэг байгаагийн талд нь байшин, барилга барьчихсан байна-

21 аймгийн Газрын харилцаа, барилга, хот байгуулалтын газар, нийслэл, дүүргийн газар зохион байгуулалтын албаны дарга нарын удирдах ажилтны ээлжит зөвлөгөөн өнгөрсөн баасан гарагт боллоо. Тус зөвлөгөөнөөр газрын чиглэлээр баримталж буй бодлого, хууль, эрх зүйн орчин, Геодези, зураг зүй, суурь судалгаа мониторинг, Кадастр, Газар зохион байгуулалт, Орон зайн мэдээлэл, технологи, Архивийн мэдээлэл, Хот байгуулалтын чиглэлээр өнгөрсөн онд хэрэгжүүлсэн ажлаа танилцуулсан юм.  Энэ үеэр Барилга, хот байгуулалтын сайд Б.Мөнхбаатараас зарим зүйлийг тодрууллаа.

-Газар олголтыг ил тод болгож, цахимжуулах чиглэлээр ямар ажлууд хийж байна вэ?

-Газар олготыг ил тод болгож, цахимжуулах ажлыг үе шаттай хийсэн. Газрын нэгдмэл сан, цахимжуулах нэгдлийн хүрээнд аймаг, нийслэл, дүүргийн Засаг дарга нарын жил бүр баталдаг газар зохион байгууллалтын төлөвлөгөөг нэгдсэн мэдээллийн санд оруулсан. Газар зохион байгууллалтын төлөвлөгөөнд орсноор хуулийн дагуу газрын дуудлага худалдаа, төсвийн сонгон шалгаруулалтад орох ёстой. Мөн газрын биржээр дуудлага худалдаа хийж эхэлсэн. Газар олголт цахим болж, иргэд үр дүнг шууд мэдэрдэг байх ёстой.

-Хөдөө, орон нутгийн газар төлөвлөлт болон дэд бүтэц ямар байгаа вэ?

 -Орон нутаг, хот төлөвлөлтийг хөгжүүлэхийн тулд  дарга нар зөвхөн газраар хэмжиж бодох шаардлагагүй. Тухайн аймгийнхаа төлөвлөлтийг ойлгох хэрэгтэй. Төлөвлөлтөө зөв хийж, дэд бүтцээ шийдэх нь чухал. Аймгуудад цэвэр, бохир ус дамжуулах шугам сүлжээ, дулаан болон инженерийн шугам сүлжээний эх үүсвэр хэрэгтэй байна. Увс, Завхан, Баян-Өлгий, Дорнод, Говьсүмбэр гэх таван аймаг цэвэрлэх байгууламжгүй байгаа. Цэвэрлэх байгууламж, дулааны станцаа өргөжүүлж байж орон сууц барина. Тэгэхээр газрын харилцааны дарга аймаг, орон нутгийнхаа төлөвлөгч байх ёстой. Зураг, техникийн шийдэл, төсөв гарч байж байшин барина. Тухайлбал, Завхан аймаг хоёр голын дунд байдаг учир байшин барих бололцоо, дэд бүтэц байдаггүй.

-Газрын тухай хуулийг өөрчилж, шинэчлэх шаардлагатай юу?

-Газрын тухай ерөнхий хууль, Газрын кадастрын тухай хууль, Газрын төлбөрийн тухай хууль гэх мэт зургаан багц хуулийг боловсруулж, Улсын их хуралд өргөн барих гэж байгаа. Бэлчээрийн мал аж ахуй, газар тариалан, ашигт малтмал, хот суурингийн дунд газрын зөрчил, маргаан их байдаг. 2002 онд баталсан хуулийг нийгмийн харилцааг дагаад зайлшгүй шинэчлэх шаардлагатай. Хот байгууллалтын хуулийг Улсын их хуралд өргөн барьсан боловч газартай холбоотой учир хүлээгдэж байна. Нийгмийн эрх ашгийн төлөө дэд бүтэц байгуулах асуудалд хүч хэрэглэхгүй, тохиролцоо хийхээр ажил явахгүй байна. Газрын нарийн байршлууд гарч байж төмөр зам, байгалийн хий хоолой тавих ажлуудад улсаас хөрөнгө оруулах ёстой. Нүдэнд харагдахгүй ажлуудыг анхаарахгүй өнгөрч байна. Улаанбаатар хотод геодезийн 360 орчим нарийн цэг байгаагийн талд нь байшин, барилга барьчихсан. Геодезийн цэгийг тавих, өндөржилтийг хийхэд төсөв, хөрөнгө оруулалт хэрэгтэй байна.