Цаг уур, орчны шинжилгээний ажилтан, цаг уурч Б.Жаргалангаас энэ өвлийн цаг агаарын ерөнхий төлөв байдлын талаар тодрууллаа.

-Арванхоёрдугаар сарын дунд болон сүүлийн долоо хоногт цаг агаарын төлөв байдал ямар байхаар байна вэ?

-Баруун аймгуудын нутгаар олон жилийн дунджаас хүйтэн. Бусад нутгаар олон жилийн дунджийн орчим байх төлөвтэй байна. Увс, Завхан аймгийн ихэнх нутаг, Говь-Алтай, Баянхонгор аймгийн хойд хэсэг, Хэнтий, Дорнод, Сүхбаатар, Дорноговь аймгаар олон жилийн дунджаас ахиу, бусад нутгаар дунджийн орчим цас орно.

-Зарим аймагт зуншлага тааруу болж, өвөлжилт хүндрэх эрсдэлтэй байна. Энэ өвлийн цаг агаарын төлөв байдлын талаар тодорхой мэдээлэл өгөхгүй юү?

-Манайхаас гарсан урьдчилсан төлвөөр арванхоёрдугаар сард Их нууруудын хотгор болон Хангайн нуруу, Хөвсгөлийн уулархаг нутаг, Хэнтийн нуруу, Дорнод Монголын тал нутаг болон Орхон, Сэлэнгийн сав газраар олон жилийн дунджаас 1-1.5 градус хүйтэн байна. Ирэх оны нэгдүгээр сараас  Увс, Завханы баруун хэсэг, Хөвсгөлийн зүүн, Архангай хойд хэсэг олон жилийн дунджаас хүйтэрнэ. Хоёрдугаар сард нутгийн зүүн өмнөд хэсгээр олон жилийн дунджаас дулаан гуравдугаар сард ихэнх нутгаар дунджаас дулаан байх төлөв ажиглагдсан.

Энэ өвөл Завхан, Хөвсгөл, Архангай, Өвөрхангай, Баянхонгор аймгийн хойд хэсгээр олон жилийн дунджаас ахиу цас орно. Их нууруудын хотгор, Орхон, Сэлэнгийн сав газраар олон жилийн дунджаас хүйтэн, Дорнод монголын тал болон Дорнод говийн нутгаар олон жилийн дунджаас дулаан, Алтай нуруугаар олон жилийн дунджийн орчим байна. Алтай, Хангай, Хөвсгөлийн уулархаг нутаг, Их нууруудын хотгор, Орхон, Сэлэнгийн сав газраар олон жилийн дунджаас ахиу, Дорнод монголын тал нутгаар олон жилийн дунджийн орчим цас орох төлөвтэй байна. Нийт нутгаар олон жилийн дунджийн орчим байх төлөв гарсан. Өнгөрсөн зун нутгийн баруун өмнөд хэсгээр буюу Говь-Алтай, Баянхонгор, Архангай, Өвөрхангай, Өмнөговь, Дундговь аймгийн нутгаар бороо хур харьцангуй бага орсон. Үүнтэй холбоотойгоор дээрх аймгуудад өвөл, хаврын даац бэлчээрийн хэтэрчээ. Мөн дээрх аймгуудын нутгуудаар олон жилийн дунджаас хүйтэн байх төлөвтэй тул малчид, ард иргэд цаг агаарын мэдээг тухай бүрт нь харж, урьдчилан хадлан тэжээлээ бэлтгэх шаардлагатай.  

-Ус цаг уур орчны шинжилгээний газраас цаг агаарын урьдчилсан мэдээг хэрхэн гаргадаг талаар уншигчдад тодорхой мэдээлэл өгөхгүй юү. Монгол орны хэмжээнд хэдэн цаг агаарын станц ажиллаж байна вэ?

-Ус цаг уур орчны шинжилгээний байгууллагаас улсын хэмжээнд 300 гаруй станц, харуул дээр агаарын температур, хур тунадас, агаарын чийгшил, салхины зүг хурд, агаарын даралт зэрэг цаг уурын хэмжүүрийг хоногт 4-8 удаа ажиглалт судалгаа хийдэг. Эдгээр ажиглалтын мэдээнд тулгуурлан агаар мандлын физик болон математик процессуудыг үнэлж анализ хийн, том хэмжээст агаар мандлын процессуудыг дэлхийн хэмжээний динамик болон статистик загваруудыг ажиллуулж, тухайн загваруудын үр дүнгээр агаар мандалд ажиглагдаж буй үзэгдэл хэзээ, хаашаа хэрхэн шилжихийг өндөр хүчин чадалтай компьютерийн тусламжтайгаар тооцоолон гаргадаг.