Монголын Хөгжмийн Зохиолчдын Холбооны анхны Нарийн бичгийн дарга, Монголын хамгийн анхны эмэгтэй хөгжмийн зохиолч С.Мааяа тухайн үеийн  Умард Африкийн Алжир хотоос БНМАУ-ын Дорноговь аймагт суугаа анд нөхөр, “Баатарлаг зохиолын мастер” хэмээн уншигч олондоо дурсагдан үлдсэн зохиолч Н.Надмидад хаягласан захидлыг хүргэж байна.

Анд найз Надмидынхаа амрыг эрье!

Та нар сайн сууцгааж байна уу? Надмид найз хаана, ямар алба хааж байна вэ?

          Манай энд өвөл болж, бороо их орж, газар ногоорч цэцэг навч дэлгэрэн жимс ургаж байна. Хүмүүс хүйтэн байна гэж ноосон цамц, пальто өмсөх, зарим нь костюмтай явах. Нартай өдөр бас ч халуун. Саяхан Сахарын Гардая, Ургала, Тугурт, Бүсада, Бискара хотуудаар аялав. Франц хэл үзэж байгаа боловч ахиц муутай. Ер нь нас ахисан хойно хэл оролдох нэлээд яггүй байдаг аж. Уран бүтээл гэж хийсэн юмгүй. Дотроо бага сага юм бодож түүнийгээ нутагтаа очиж, заримыг нь цаасан дээр буулгах, заримыг нь хөгжимд оруулах сан гэж яарч сууна. Ярьж хэлэлцэх сонин сайхан юм их байна.

          Зөвлөлтийн хөгжмийн зохиолчдын их хурал арванхоёрдугаар сарын 16-нд болно. Түүндээ ирээч гэж утас ирүүлсэн. Одоо ажил алба хаагаагүй болохоор очих шаардлагагүй гэж бодло. Ном зураг, янз бүрийн модон баримлууд цуглуулж байна. Хэл сурсан хойноо унших сонин номууд цуглуулж байна. Одоо энд Рамадан гэдэг мацаг барьдаг сар эхэлчихсэн. Хүмүүс, өдөр хоол идэхгүй, тамхи ч татах учиргүй.

          Хавар тийш хонины баяр гэж том баяр болно. Нэлээд материал цуглуулж байна. Иймд тэмдэглэл зүгээр болох байх. Өнөө Гвинейн тухай тэмдэглэл юу болсон бэ? Гологдсон уу?

          Чамаас инээдэмтэй бүтээл гарна гэж найдаж байна. Ванган, Цогзолмаа болон бусад найзуудад мэндийг минь уламжлахыг хүсье.

С.Мааяа

1968 оны арванхоёрдугаар сарын 18. Алжир хот