Монголын хүндийн өргөлтийн спортын ирээдүй болсон, найдвар хүлээлгэж буй тамирчдын нэг нь “Ээрмэл" клубийн тамирчин, спортын мастер Оюунболдын Оюунжаргал билээ. Тэрбээр 2003 оны энэ өдөр Төв аймгийн Баяндэлгэр суманд мэндэлжээ. О.Оюунжаргал хүндийн өргөлт, жүдо бөх, пауэрлифтинг, гар барилдааны төрлөөр хичээллэдэг. Пауэрлифтингийн ОУХМ цолтой. Хэвтээ шахалтын залуучуудын Ази тивийн аварга, улсын дээд амжилт, рекордын эзэмшигч тамирчин юм. Хүндийн өргөлтийн 2025 оны УАШТ-ий эмэгтэйчүүдийн 81 кг-ын жинд 194 кг-ыг өргөж, спортын мастерын болзол биелүүлсэн юм.

     Хүндийн өргөлтөөр хүүхдийн спортын 5-р их наадмын хүрэл, 6-р их наадмын алтан медальтай. Өсвөрийн төрөлдөө зургаан удаа УАШТ-ээс алт, мөнгө, хүрэл медаль хүртсэн. Залуучуудын УАШТ-ээс мөнгө, хүрэл, насанд хүрэгчдийн УАШТ-ий мөнгө, хүрэл медальтай. Мөн жүдо бөхийн өсвөр үеийн нэрэмжит тэмцээнээс хүрэл авч байсан. Жүдо бөхийн өсвөр үеийн улсын аваргын багийн хүрэл медальтай.

      Хэвтээ шахалтын залуучуудын Азийн аваргын алтан медальтай. Насанд хүрэгчдийн Азийн аваргын мөнгө, залуучуудын ангиллаас алтан медаль хүртэж байв. Пауэрлифтингийн насанд хүрэгчдийн улсын аваргын дөрвөн мөнгө, нэг хүрэл медальтай. Залуучуудын УАШТ-д хоёр удаа түрүүлж байсан. Пауэрлифтингийн гараар таталтын насанд хүрэгчдийн хоёр удаагийн улсын аварга, бүх жингийн рекордыг эзэмшдэг шилдэг тамирчин юм.