“Улаанбаатар-2025” жүдо бөхийн “Их дуулга” тэмцээний хоёр дахь өдрийн барилдаан өчигдөр явагдаж өндөрлөв. Эмэгтэйчүүдийн 63 кг-ын жинд  ДАШТ-ий хүрэл  медальт, ОУХМ Болдын Ганхайч гар нь бэртсэн хэдий ч тэсвэр, тэвчээр гарган барилдаж, “Их дуулга” тэмцээний алтан медалийг хүртлээ. Тэрбээр финалд Ази тивийн аварга, Загребийн “Гран при”, Ташкентийн “Гран слам”-ын аварга Японы Кирари Ямагүчигийн эсрэг арван минут үргэлжилсэн хүнд барилдаан хийж, нэмэлт цагт даралтаар цэвэр яллаа.

        ОУХМ Б.Ганхайч барилдааны явцад гараа хөшүүлэн гэмтэл авсан ч шүд зуун зүтгэсээр ялалтад хүрсэн нь гайхалтай байлаа. Түүний хувьд өмнө нь мөрөндөө авсан хүнд бэртлийн улмаас жүдо бөхөөс жил гаруй хугацаанд хөндийрч байсан билээ. Улмаар бэртлээ эдгээн эргэж ирээд дэлхийн дэвжээнээс медаль хүртсэн юм.  ОУХМ Б.Ганхайч өмнө нь Улаанбаатарын “Их дуулга”-ыг  “Гран при” ангиллын  тэмцээн байхад  мөнгөн медаль хүртэж байсан бол энэ удаа дутуугаа гүйцээж, хөгжөөн дэмжигчдээ баярлууллаа. Ийнхүү тэрбээр  “Гранд слам”-ын хошой алтан медальтан боллоо.

Эмэгтэйчүүдийн 63 кг-д медаль хүртсэн тамирчид:

1.Болдын Ганхайч (Монгол)

2.Кирари Ямагүчи (Япон)

3.Нина Шимич (Хорват)

3.Гаэтанэ Дебер (Франц)

       “Улаанбаатар-2025” жүдо бөхийн “Их дуулга” тэмцээнээс Монголын багийн хоёр дахь алтан медалийг эрэгтэйчүүдийн 73 кг-ын жинд ОБЕГ-ын "Аврагч" спорт хороо, "Бор Өндөр Мандал" компанийн тамирчин, ОУХМ Одгэрэлийн Уранбаяр хүртэв. Тэрбээр өчигдөр үнэхээр онцгой, уран гоё барилдаж, учраа бүрээ илүүрхэн ялсаар аваргын алтан медальд хүрэв. Финалд тэрбээр Тажикистаны Масуди Ахмадзодыг сууж үүрэх мэхээр юүко үнэлгээ авч ялсан юм. О.Уранбаяр өмнөх даваануудад Хятадын Ли Жин Ханыг цэвэр, нутаг нэгт Л.Анхзаяаг цаг дуусахтай зэрэгцэн юүкогоор, хагас шигшээд Японы Юүдай Танакаг дархан хөл тавих мэхээрээ цэвэр ялж, финалд шалгарсан.

     Энэ жинд ДАШТ-ий хүрэл медальт, ОУХМ Лавжаргалын Анхзаяа хүрэл медаль хүртлээ. “Женко” клубийн тамирчин Л.Анхзаяа АНЭУ-ын нэр дээр барилдаж буй Оросын бөх Казбек Нагучевийг нэмэлт цагт буулган авч, “Гран слам”-ын хүрэл медалийн эзэн болсон юм.

Эрэгтэйчүүдийн 73 кг-ын жинд медаль хүртсэн тамирчид:

1.Одгэрэлийн Уранбаяр (Монгол)

2.Ахмадзод Масуди (Тажикистан)

3.Лавжаргалын Анхзаяа (Монгол)

3.Юүдай Танака (Япон)

      “Улаанбаатар-2025” жүдо бөхийн “Их дуулга” тэмцээний эмэгтэйчүүдийн 70 кг-ын жинд Монголын хоёр бөх хоорондоо  хүрэл медаль төлөө барилдлаа. Энэ өрсөлдөөнд 19 настай Д.Есүй,  өсвөрийн ДАШТ-ий хүрэл, Азийн аваргын хошой хүрэл медальт, Монгол Улсын аварга Б.Ням-Эрдэнийг илүүрхэж, “Гранд слам”-аас хүрэл  медаль хүртэв. Б.Ням-Эрдэнэ гарын бэртэлдээ эмзэглээд төдийлөн барилдаан гаргаж чадсангүй. Залуу тамирчин Дарханбатбаярын Есүй 2022 онд өсвөр үеийн Азийн аваргаас мөнгөн медаль авч байсан.  2023 оноос хойш насанд хүрэгчдийн тэмцээнд өрсөлдөж эхэлсэн ч олон улсын тэмцээнээс хараахан медаль авч амжаагүй байсан юм. Харин энэ удаа нутгийн дэвжээн дээрээ урамтай сайхан барилдаж, “Их дуулга”-ын медальтан болж байна. Өчигдөр эрэгтэйчүүдийн 81 кг-ын жинд манай улсаас дөрвөн тамирчин өрсөлдсөн хэдий хараахан медаль байрт хүрч чадсангүй.

Эмэгтэйчүүдийн 70 кг-ын жинд медаль хүртсэн тамирчид:

1.Утана Терада (Япон)

2.Лу Лиү (БНХАУ)

3.Д.Есүй (Монгол)

3.Юүн Гюн Фен (БНХАУ)

Эрэгтэйчүүдийн 81 кг-ын жинд медаль хүртсэн тамирчид:

1.Юүхэй Оино (Япон)

2.Гажимурад Омаров (АНЭУ)

3.Адам Цечоев (IJF)

3.Аскерби Гербеков (Бахрейн) тус тус хүртсэн. Өнөөдөр эмэгтэйчүүдийн -78, +78 кг, эрэгтэйчүүдийн 90, -100, +100 кг-ын жингийн барилдаан явагдаж “Гранд слдам” тэмцээн өндөрлөнө.