Холимог тулааны 2025 оны өсвөр үеийн дэлхийн аварга шалгаруулах тэмцээнд оролцох Монгол Улсын баг тамирчид оролцож байна.  Арабын Нэгдсэн Эмират Улсын Аль-Айн хотод долдугаар сарын 21-27-ны өдрүүдэд  ДАШТ зохион байгуулагдаж өндөрлөх юм. Тус ДАШТ- д 65 орны 1000 орчим өсвөрийн тамирчин өрсөлдөж байна.  Жилээс жилд хамрах цар хүрээгээ тэлж буй холимог тулааны өсвөрийн дэлхийн аварга энэ жил 10-11, 12-13, 14-15, 16-17  нас гэсэн дөрвөн насны ангиллаар явагдаж байгаа юм.

     Монгол Улсаас тус тэмцээнд нийт арван тамирчин, нэг  дасгалжуулагчийн бүрэлдэхүүнтэй баг оролцож байна.  Тэмцээний 12-13 насны ангиллын  40 кг-ын жинд Ө.Долгион  “Кинг Панда” клуб,  48 кг-д Ө.Очир-Эрдэнэ “Кинг Панда”,  62 кг-д Л.Ананд “Кинг Панда” клубээс өрсөлдөнө.

    14-15 насны ангиллын 40 кг-д Г.Түвшинбилэг “Кинг Панда”, 48 кг-д Б.Тэлмүүн “New Gen team” , 52 кг-д Ө.Дөлгөөн “Кинг Панда”, 67 кг-д Б.Батхаан  Баянгол дүүргийн “ХЗСО”-гоос  тулалдана.  Харин ахлах  нас буюу 16-17 насны ангиллын 61.2 кг-д А.Анир Баянгол дүүргийн “ХЗСО”, - 70.3 кг-д М.Өнөмөнх “Шандас ММА”,  88.4 кг-д Н.Алтантулга Баянгол дүүргийн “ХЗСО”-гоос эх орноо төлөөлөн октагонд гарна.

    Баг тамирчдын ахлагч, дасгалжуулагчаар Монголын холимог тулааны холбооны Шүүгчдийн зөвлөлийн гишүүн, “Кинг Панда” клубийн дасгалжуулагч Ч.Бат-Амгалан ажиллаж байна. Тэмцээн Аль-Айн хотын “ADNEC Centre” ордонд  энэ сарын 21-ний өдөр ДАШТ  бага насны ангиллаар эхэлсэн .