Монголын хөл бөмбөгийн холбооны  дээд лигийн 2024-2025 оны улирлын хаалтын ёслол боллоо. Тус хаалтын ёслол  2025 оны долдугаар сарын 20-ны өдөр Монголын хөл бөмбөгийн холбооны цэнгэлдэх хүрээлэнд амжилттай зохион байгуулагдлаа. Энэ жил тус тэмцээнд арван баг оролцож, 132 тоглолт зохион байгуулагдаж, аваргууд тодорлоо.

    Хаалтын ёслолд Монголын хөл бөмбөгийн холбооны ерөнхийлөгч Цогт-Очирын Анандбазар, Лигийн зөвлөлийн дарга Мээрэнгийн Амарбаясгалан, Техникийн захирал Андреас Шпийр болон бусад зочид, төлөөлөгчид оролцов.

Монголын дээд лигийн 2024-2025 оны шилдгүүд :

Тэмцээний хамгийн “Шилдэг шүүгч”-ээр “AFC Elite” шүүгч Болдын Хаш-Эрдэнэ шалгарч, шагналыг техникийн захирал Андреас Шпийр гардуулан өглөө. Мөн “Хамгийн цэвэр тоглолттой баг”-ийн шагналыг “Брера-Илч” клуб хүртсэн бөгөөд тус клуб хамгийн цөөхөн шар, улаан хуудас авсан багаар тодорсон юм.

“Шилдэг хаалгач”-ийн шагналыг энэ жил “СП Фалконс” клубийн хаалгач Х.Цэнгүүн хүртэж, шагналыг  Лигийн зөвлөлийн гишүүн Чинбаатар гардуулан өгөв. Түүнчлэн “Хангарьд” клубийн хаалгач П.Баярцэнгэл мөн шагналыг хүртсэн юм.

“Шилдэг хагас хамгаалагч”-ийн шагналыг “СП Фалконс” клубийн тоглогч Алконс Андре Фэррэйра (11 гоол, 12 ассист) гардан авсан бол “Шилдэг довтлогчийн шагнал”-ыг  “СП Фалконс” багийн тоглогч Мягмарын Батхишиг (32 гоол) хүртэв.

Дээд лигийн хүрэл медалийг  “ЭФ СИ Улаанбаатар” клуб, мөнгөн медалийг “Хангарьд” клуб, Алтан медалийг “СП Фалконс” клуб тус тус хүртэж, Монголын хөл бөмбөгийн холбооны ерөнхийлөгч Цогт-Очирын Анандбазар шагналыг гардуулан өгч, дурсгалын зураг татууллаа.

МОНГОЛЫН ДЭЭД ЛИГИЙН 2024-2025 оны “ ШИЛДЭГ 10 БАГ”

1. “СП Фалконс” (Аварга)

2. “Хангарьд” (Мөнгөн медаль)

3. “ЭФ СИ Улаанбаатар” (Хүрэл медаль)

4. “Дэрэн”

5. “Бишрэлт-Хоромхон”

6. “Ховдын Хүлэгүүд”

7. “Хантерс”

8. “Эрчим”

9. “Төв Азарганууд”

10. “Брера-Илч”.