Тулгар төрийн 2232, Их Монгол Улсын 817, үндэсний эрх чөлөө, тусгаар тогтнолоо сэргээн мандуулсны 112, ардын хувьсгалын 104, ардчилсан хувьсгалын 35 жилийн ойн үндэсний их баяр наадмын хүчит бөхийн барилдааны тавын давааны барилдаанууд үргэлжилж байна.  Энэ жилийн наадмын эхний улсын начин цолтон төрлөө. Дорнод аймгийн Баян-Уул сумын харьяат,  "Дорнын Хүчтэн" дэвжээ, "Хилчин" спорт хороо, хилийн цэргийн 0208-р  ангийн бөх, аймгийн арслан Мөнхжаргалын Бэлгүтэй улсын заан Д.Анараар тав даван Монгол Улсын начин цолны болзол хангалаа. Тэрбээр "Төрийн наадамдаа найм дахь жилдээ барилдаж, улсын цолонд хүрлээ. Нутгийн зон олондоо, намайг дэмждэг бүх хүнд баярлалаа гэж хэлье. Энэ жил миний бэлтгэл их сайн хангагдсан. Цагаан сарын барилдаанд шөвгийн дөрөвт шалгарсан. Улсын баяр наадамдаа од хийморьтой сайхан барилдаж, улсын цолтны эгнээнд багтаж орж байгаа даа баяртай байна" гэв.