Чөлөөт бөхийн залуучуудын ДАШТ-ий мөнгө, хүрэл медальт, Чөлөөт бөхийн Үндэсний шигшээ баг, Хил хамгаалах ерөнхий газар, “Хилчин” спорт хорооны тамирчин, ОУХМ Бямбасүрэнгийн Бат-Эрдэнэ Булган аймгийн Сайхан суманд 1999 оны энэ өдөр мэндэлжээ.

      Тэрбээр өчигдөр Орхон аймгийн баяр наадамд түрүүлж, аймгийн арслан цол хүртсэн. ОУХМ Б.Бат-Эрдэнэ 2013 онд Орхон аймгийн “Ирээдүйн-Одод” дунд сургуульд ОУХМ Б.Идэрсайханы удирдлага дор чөлөөт бөхийн спортоор хичээллэж эхэлсэн байдаг. Б.Бат-Эрдэнэ 2015 оны өсвөр үеийн УАШТ-ий алтан медаль хүртэж амжилтын гараа нь эхэлсэн юм.

      Улмаар Монголын хүүхдийн спортын V наадмаас алт, “Монгол туургатан” олон улсын хүүхдийн спортын наадмаас хүрэл, “Асашёорюү Кап” өсвөр үеийн олон улсын тэмцээнээс мөнгө, 2016 оны  өсвөр үеийн УАШТ-ээс алт, “Асашёорюү Кап” өсвөр үеийн олон улсын тэмцээнээс алтан медаль хүртэж байсан. Залуучуудын ДАШТ-ээс 2018 онд хүрэл, 2019 онд мөнгөн медаль хүртжээ.