Боксын дэлхийн аваргын мөнгөн медальт, ОУХМ Лутсайханы Алтанцэцэг 1995 оны энэ өдөр Дорнод аймагт мэндэлжээ. Боксын насанд хүрэгчдийн дэлхийн аваргаас Монголын эмэгтэй тамирчдын анхны мөнгөн медалийг  тэр хүртсэн.  “Аврагч” спорт хорооны тамирчин, ОУХМ Л.Алтанцэцэг  Ази тивийн аварга шалгаруулах тэмцээний хошой хүрэл медальтай. Тэрбээр ДАШТ-ий 48 кг-ын жингийн рингэнд цахиур хагалж, гал гарсан ширүүн тулааныг хийж дэлхийн аваргын мөнгөн медалийг эх орондоо авчирч байсан билээ. Энэ амжилтад Л.Алтанцэцэгт амар хялбараар хүрээгүй. Олон жилийн бэлтгэл,  уйгагүй хичээл зүтгэлийн үр шим байлаа. Гэмтэл, бэртэл, саад бэрхшээлийг сэтгэлийн хатаар даван туулан, туучин гарч дэлхий шилдэг боксчдын нэг болсон юм.