Тулгар төрийн 2234 жил, Их Монгол Улс байгуулагдсаны 819 жил, Үндэсний эрх чөлөө, тусгаар тогтнолоо сэргээн мандуулсны 114 жил, ардын хувьсгалын 104 жилийн ойн үндэсний их баяр наадмын буриад сурын харваа өчигдөр өндөрлөв. Буриад сурын харваанд 250 гаруй харваач цэц мэргэнээ сорьж өрсөлдсөн байна. Үндэсний их баяр наадмын Буриад сурын эрэгтэйчүүдийн харваанд Ц.Ганбаатар, эмэгтэй харваачдаас Э.Болормаа нар түрүүллээ. Буриад сурын харваа энэ жилийн баяр  наадмаас эхлэн шинэчлэгдсэн дүрмийн дагуу явагдлаа. Харваачид 30 м болон 45 м-ийн хоёр зайд 48 сум тавьсан юм. Эрэгтэй харваачдаас Өвөрхангай аймгийн Баянгол сумын харъяат Ц.Ганбаатар 48 сумаас, 47 онож түрүүллээ. Харин эмэгтэй харваачдаас Дархан-Уул аймгийн залуу харваач Э.Болормаа 48 сумаас, 44 онож түрүүлээд байна.