Монгол уяачдын ур чадвар дэлхий дахинд танигдсаар байна. Америк тивд Монгол Улсын “Алдарт уяач” Э.Ганбат олон уралдаанд морь сойж, 50 гаруй удаа түрүү хүртэн, Монгол Улсынхаа нэрийг морин спортын ертөнцөд дуурсгасан билээ. Тэр дундаа дэлхийн хамгийн өндөр зэрэглэлийн “Group-1” уралдаанд “MONGOLIAN SATURDAY”,  “MONGOLIAN GROOM” хэмээх хурдан хүлгүүд түрүүлж, монголчуудын омогшил, бахархлын бэлгэ тэмдэг болсон түүхтэй.

     Тэгвэл энэ удаад Монгол уяачийн морь Австрали тивд анх удаа түрүүлж, түүхэнд шинэ хуудас нэмлээ. “Mongolian Gobi” нэртэй энэ сайхан хүлгийг  “Тод манлай” уяач Ононгийн хүү Батбилэг болон Батжаргал (Хада) нартай хамт Шинэ Зеланд Улсаас дуудлага худалдаагаар авч, Монгол хүний уяачийн эрдэм, сэтгэлийг шингээн уралдуулж, ийнхүү бахдам амжилтаар тамгаллаа.