Казахстан Улсын Астана хотноо боксын дэлхийн цомын тэмцээн зохион байгуулагдаж байна.  Дэлхийн цомын тэмцээнд Монголын тамирчид амжилттай оролцож, хоёр жингийн ангилалд медаль хүртлээ.

      Эрэгтэйчүүдийн 60 кг-ын жинд ОУХМ  Г.Лундаа мөнгөн медалийн эзэн боллоо. Тэрбээр дэлхийн цомын тэмцээний эхний тойрогт гоц мөргөж ялалт авсан.  Хоёрдугаар тойрогт АНУ-ын тамирчинг шүүгчдийн санал нэгтэйгээр 5:0-ий харьцаатай ялсан.

      Улмаар дараагийн тойрогт Киргизстаны тамирчинг 3:2-ын харьцаатай ялж, Японы шилдэг тамирчинг гуравдугаар үед хүнд цохилтоор ялсан юм. Финалд шүүгчдийн саналаар Бразилийн тамирчинд ялагдаж, мөнгөн медаль хүртэв.

       Дэлхийн цомын тэмцээний 70 кг-ын жинд ОУХМ О.Бямба-Эрдэнэ хүрэл медалийн эзэн боллоо. Тэрбээр Өмнөд Солонгосын тамирчинг 5:0-ийн  харьцаатай ялсан. Дараагийн тойрогт Шведийн тамирчинг 3:2-ын харьцаатай ялсан бөгөөд  мөнгөн медалийн төлөөх тулаанд Бразилийн тамирчинд 5:0-ийн харьцаатай ялагдаж, хүрэл медаль хүртсэн байна.