Монгол улсын Ерөнхийлөгчийн зарилгаар гавьяат тамирчин цол хүртсэн 3х3 сагсанбөмбөгийн шигшээ багийн тамирчин О.Хулангаас баяры сэтгэгдлээ хуваалцлаа. Тэрбээр “Манай багийхан Монгол улсын гавьяат тамирчин цол тэмдэг авах болсон мэдээг сонсоод зүүд биш биздээ гээд нэг нэгнийгээ чимхэж үзсэн. Үгээр хэлэхийн аргагүй маш их баярлаж байна. Монгол улсын төр засагтаа бидний хөдөлмөрийг үнэлсэнд талархаж байна. Долоон жилийн турш маш их хожигдлын амссан ч гэсэн хэзээ нэгэн өдөр Монгол ард түмнээ баярлуулахыг хүсдэг байсан. Энэ мөрөөдлөө тээж энэ олон жил маш их шаргуу хөдөлмөрлөсний үр дүн өнөөдөр гарлаа. Манай баг залуу баг. Тийм болохоор бидэнд цаашдаа илүү ихийг бүтээх ирээдүй байгаа. Монгол улсынхаа нэрийг улам өндөрт өргөж, биднийг дэмжиж буй ард түмнийхээ хайр хүндэтгэлийг алдахгүй цаашдаа улам хичээх болно. Сонин сонсогдож магадгүй ч Чингис хаан маань биднийг түшиж, туслаад байсан юм шиг итгэлтэй мэдрэмж төрсөн” гэв.