Сагсан бөмбөгийн 3Х3-ын дэлхийн аварга шалгаруулах тэмцээнээс мөнгөн медаль хүртсэн тамирчид Монгол Улсын Ерөнхийлөгч зарлигаар Монгол Улсын гавьяат тамирчин цол, тэмдгийг хүртлээ. Монгол Улсын сагсан бөмбөгийн 3х3-ын эмэгтэй шигшээ багийн тоглогч ОУХМ Мөнхсайханы Цэрэнлхам, ОУХМ Онолбаатарын Хулан, ОУХМ Бат-Эрдэнийн Ариунцэцэг, спортын мастер Нямжавын Нандинхүсэл нар Монгол Улсын гавьяат тамирчин боллоо.

     Тэд сагсан бөмбөгийн спортоос төрөн гарсан анхны эмэгтэй гавъяат тамирчин болж байна. Нямжавын Нандинхүсэл 18 настайдаа Монгол Улсын гавьяат тамирчин цол хүртсэн анхны тамирчин болж байгаа юм. Эмэгтэй шигшээ багийн дасгалжуулагч Канад Улсын иргэн Стив Серийг “Найрамдал” медалиар шагнав.

    “Спортын гавьяат мастер” хэмээх цолыг анх 1960 оноос олгож эхэлсэн бөгөөд 1992 оноос “Гавьяат тамирчин” гэж өөрчилжээ. Өнгөрсөн 65 жилийн хугацаанд тус цолыг сагсан бөмбөгийн спортоос эмэгтэй тамирчин хүртэж байгаагүй. Сагсан бөмбөгийн 3х3 төрлийн шигшээ багийнхан анхдагчид боллоо. Харин эрэгтэйчүүдээс Ц.Шаравжамц, Т.Түвшинбаяр, Б.Билгүүн нарын гурван тамирчин л хүртэж байв. Багийн спортын төрлүүдээс Ц.Шоовдор, Л.Нарантуяа нар волейболын эмэгтэй тамирчдаас Монгол Улсын гавьяат тамирчин цолыг хүртэж байсан. Ийнхүү Монголын сагсан бөмбөгийн спортоос 65 жилийн хугацаанд нийт долоон тамирчин л гавьяат тамирчин цол хүртлээ.