1998 оны  энэ өдөр Сэлэнгэ аймгийн Цагааннуур сумын харьяат, "Алдар" спорт хороо,  “Атар Трейд” ХХК, “АПУ” ХК, "Таван Хан" дэвжээний бөх,  улсын арслан Баярсайханы Орхонбаяр мэндэлжээ. Улсын арслан Б.Орхонбаяр 2018 онд Сэлэнгэ аймгийн баяр наадамд аймгийн харцага Н.Энхжаргалаар найм даван түрүүлж  аймгийн арслан цол хүртсэн.  2019 онд Сэлэнгэ аймгийн баяр наадамд аймгийн арслан Н.Баярбаатараар найм даван түрүүлж  аймгийн арслан цолоо баталж,  "Хурц" чимэг нэмсэн.

    2019 онд төрийн наадамд 21 насандаа анх удаа барилдахдаа улсын начин цол хүртэж, тухайн жил начин болсон хамгийн залуу бөхөд олгодог дааганы эзэн болж байлаа.  2020 оны АХ-ын 99 жилийн ойн баяр наадамд улсын начин Б.Цэдэнсодномоор дөрөв, аймгийн арслан Д.Тогтохжаргалаар тав даван шөвгөрч начин цолоо батлан "Өсөх идэр" чимэг нэмсэн. Тус жил аймгийн арслан Б.Бат-Орших сэргээш хэрэглэсэн байсан тул 2021 онд давааг нь нөхөн олгож "Монгол улсын харцага" цолыг хүртсэн.

    2022 оны ардын хувьсгалын 100,101 жилийн ойн баяр наадамд аймгийн арслан Д.Алтанцоожоор дөрөв, аймгийн арслан Д.Бадамгараваар тав, аймгийн арслан О.Цэцэнцэнгэлээр зургаа, улсын арслан Ц.Содномдоржоор долоо, улсын харцага Б.Бат-Өлзийгөөр найм, даян аварга Н.Батсууриар ес даван үзүүрлэж  Монгол Улсын арслан цол хүртсэн.  2023 оны Ардын Хувьсгалын 102 жилийн ойн баяр наадамд аймгийн арслан Д.Алтанцоожоор дөрөв, улсын заан Б.Батмөнхөөр тав давж чимэг нэмсэн.

   2024 оны ардын хувьсгалын 103 жилийн ойн улсын их баяр наадамд аймгийн арслан Н.Баяржаргалаар дөрөв, аймгийн арслан Д.Бадамгараваар тав, аймгийн арслан Т.Дармаажанцангаар зургаа, Улсын харцага Г.Ганхуягаар долоо, Улсын аварга П.Бүрэнтөгсөөр найм даван үзүүрлэж "Үлэмж бадрах" чимэг нэмсэн.