Монголын сагсан бөмбөгийн түүхэн өдөр өнөөдөр тохиож байна. “ФИБА 3х3” дэлхийн аварга шалгаруулах тэмцээний хагас шигшээд Монгол Улсын 3х3 эмэгтэй шигшээ баг маань тоглоно. Монголын баг Польшийн эсрэг 17:25 цагаас тоглох гэж байна. Хэрэв манай баг хожих юм бол мөнгөн медалийн болзол хангаж, финалд дэлхийн аваргын алтан медалийн төлөө тоглох боломжтой болох юм.

     Энэ удаагийн ДАШТ-д Монгол Улсын эмэгтэй шигшээ үнэхээр гайхалтай амжилтуудыг үзүүлж ийнхүү хагас шигшээд шалгараад байна. Манай баг хэсэгтэй Бразил, Украин, олимпын аварга Германы багийг хожсон. Хасагдах шатны тоглолтод дэлхийн аварга, дэлхийн аваргын хүрэл, олимпын хүрэл медальт Хятадын багийг буулган авсан. Шөвгийн наймын тоглолтод “Токио-2020” олимпын аварга, дэлхийн гурван удаагийн аварга АНУ-ын багийг хожоод байгаа билээ.