Жүдо бөхийн 2025 оны ДАШТ энэ сарын 13-20-ны өдрүүдэд Унгар Улсын нийслэл Будапешт хотод үргэлжилж өндөрлөсөн билээ. Тус ДАШТ-ийг Монгол Улсын  жүдо бөхийн Үндэсний шигшээ багийн тамирчид хоёр хүрэл медаль, хоёр тамирчин шагналт долдугаар байрт шалгарсан амжилтаар 93 орноос багийн нэгдсэн дүнгээр 15 дугаар байрт орсон амжилтаар өндөрлүүлж байна.

    “Будапешт-2025” ДАШТ-ий хүрэл медальт, Ази тивийн аварга, “Душанбе-2025” их дуулгын аварга, Үндэсний шигшээ баг, “Алдар” спорт хорооны тамирчин ОУХМ Болдын Ганхайч өнөөдөр эх орондоо ирлээ. Түүнийг МЖХБ, “Алдар” спорт хороо, Жүдо бөхийн шигшээ багийн тамирчид, гэр бүл, найз нөхөд нь угтан авлаа. ДАШТ-ий эмэгтэйчүүдийн 63 кг-ын жинд  хүрэл медаль хүртсэн Б.Ганхайч, ДАШТ-ээс Монголын жүдочдын хүртсэн 33 дахь медаль, 20 дахь хүрэл медалийг хүртсэн амжилтыг гаргаад байна.