Унгар Улсын Будапешт хотноо зохион байгуулагдсан насанд хүрэгчдийн жүдо бөхийн дэлхийн аварга шалгаруулах тэмцээний 60 кг-ын жинд хүрэл медаль хүртсэн ОУХМ Кадербекын Ёолкод  Дархан-Уул аймгийн ЗДТГ, аймгийн Засаг дарга Б.Азжаргал, хүндэтгэл үзүүллээ.

     Өдгөө 24 настай ОУХМ К.Ёолк  анх удаа оролцсон ДАШТ-ээсээ ийнхүү хүрэл медаль хүртсэн нь Монголын жүдо бөхийн тамирчдын дэлхийн аваргын 32 дахь медаль, түүний дотор 19 дэх хүрэл медаль юм.

    Түүний анхны багш бол Дархан-Уул аймагт 2009 оноос хойш хоёргүй сэтгэл, тууштай зүтгэлээр шавь нараа дасгалжуулж буй спортын мастер Д.Балжинням билээ. Дархан-Уул аймгийн удирдлагууд хүрэл медальт тамирчинд хүндэтгэл үзүүлэхийн зэрэгцээ  гурван сая төгрөг талархлын хамт гардуулсан байна.

     Дархан хотын бүтээн байгуулалтад гар бие оролцож хувь нэмрээ оруулж яваа “Оргил Таур” ХХК-ын зүгээс баяр хүргэж Кадербекын Ёолк болон дасгалжуулагч багш спортын мастер Д.Балжинням нарт тус бүр таван сая төгрөгийн мөнгөн шагналыг гардууллаа.