Жүдо бөхийн 2025 оны дэлхийн аварга шалгаруулах тэмцээний найм дахь өдрийн барилдаан өнөөдөр буюу зургадугаар сарын 20-ны өдөр Унгар Улсын Будапешт хотод болно. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. Өчигдөр ДАШТ-ий хувийн барилдаан явагдаж дууссан. Манай улсаас хувийн төрлийн эрэгтэйчүүдийн 60 кг-ын жинд ОУХМ Кадербекийн Ёолк хүрэл медаль, эмэгтэйчүүдийн 63 кг-ын жинд ОУХМ Болдын Ганхайч хүрэл медаль, эрэгтэйчүүдийн +100 кг-ын жинд ОУХМ Батхуягийн Гончигсүрэн шагналт долдугаар байр, эмэгтэйчүүдийн 63 кг-ын жинд МУГТ Лхагватогоогийн Энхрийлэн шагналт долдугаар байр эзэлсэн амжилтаар багийн дүнгээр 15 байрт орлоо.

     Өнөөдөр холимог багийн тэмцээн эхэлнэ. Холимог багийн ДАШТ-д 16 орны баг барилдана. Эрэгтэй 107, эмэгтэй 104, нийт 211 жүдочин холимог багийн тэмцээнд өрсөлдөнө. Тэмцээн эмэгтэйчүүдийн 57,-70, +70 кг, эрэгтэйчүүдийн 73, -90, +90 кг-ын жингийн ангиллаар явагдах юм. Эмэгтэйчүүдийн 57 кг-ын жинд 16 орны 35, 70 кг-ын жинд 37, +70 кг-ын жинд 32, эрэгтэйчүүдийн 73 кг-ын жинд 32, -90 кг-ын жинд 37, +90 кг-ын жинд 35 тамирчин барилдах мэдүүлэг өгөөд байна. Ийнхүү холимог багийн тэмцээн явагдаж энэ удаагийн ДАШТ өндөрлөнө.