Монголын үндэсний олимпын хорооны ерөнхийлөгч, ОУОХ-гишүүн Б.Баттүшиг Өмнөд Солонгосын Үндэсний олимпын хороонд зочилж, ерөнхийлөгч Рью Сүн Мин (Афин 2004 ширээний теннисний олимпын аварга)-тай уулзаж, хамтын ажиллагааны санамж бичигт гарын үсэг зурсан байна.

      Санамж бичигт хоёр орны дасгалжуулагч, тамирчдын хөгжил, спортын шинжлэх ухааны судалгаа, хөгжүүлэлт, хүний нөөцийн солилцоо зэрэг ажлууд тусгагджээ Мөн уулзалтаар МҮОХ-ны ерөнхийлөгч Б. Баттүшиг Монгол Улс 2030 оны залуучуудын олимпын наадмын эрхийн төлөө өрсөлдөх төлөвлөгөөтэй байгааг дурджээ.

    Үүний хүрээнд спортын салбарын дэд бүтцийг сайжруулахад судалгааны чиглэлд хамтран ажиллах, шинэ спортын барилга байгууламжуудыг байгуулахад мэргэжлийн байгууллагатай хамтран ажиллахад бэлэн байгааг илэрхийлэв. Солонгосын ҮОХ-ны ерөнхийлөгч Рью Сүн Мин энэхүү хамтын ажиллагааны санамж бичгээр хоёр орны соёл, спортын хөгжил улам батжих болсонд баяртай байгааг онцолсон байна.