Азийн зуны спортын ХХ наадам, Япон Улсын Айчи мужийн төв Нагояа хотод 2026 оны есдүгээр сарын 19-нөөс аравдугаар сарын 4-ний өдрүүдэд зохион байгуулагдана.1958 онд Токио, 1994 онд Хирошима хотноо Азийн наадмыг хүлээн авч байсан Япончууд ийнхүү гурав дахь удаагаа Нагояа хотноо шар тивийн наадмыг хүлээн авах юм.

    “Ханжоу-2022” Азийн наадам нь “COVID-19” цар тахлын улмаас 2023 он руу хойшлогдсон тул, 2026 оны наадам нь Азийн наадмын уламжлалт дөрвөн жил тутмын мөчлөгтөө дахин орж буйгаар онцлогтой. Азийн наадмыг сурталчилах, үзэл санааг таниулах “Fun Run” буюу Хөгжөөнт гүйлтийн цуврал арга хэмжээ нь Азийн наадмын уламжлалт үйл ажиллагаа бөгөөд “Айчи-Нагояа 2026” Азийн наадмын зохион байгуулагч орныг олон нийтэд таниулах, соёлын сурталчилгаанд чиглэсэн.

     Тиймээс Олон улсын “Олимпын өдөр” буюу зургадугаар сарын 23-ны өдөр "Asian Games - Fun Run" Хөгжөөнт гүйлтийн арга хэмжээг Улаанбаатар хотноо “Үндэсний цэцэрлэгт хүрээлэн”-д зохион байгуулахаар Үндэсний олимпын хороо бэлтгэл ажлаа хангаж байна.  Азийн олимпын зөвлөлийн төлөөлөгчид энэхүү арга хэмжээнд хүрэлцэн ирж оролцох ба олон нийтэд нээлттэй зохион байгуулагдана.