“IJF” буюу Олон улсын жүдо бөхийн холбооноос дэлхий дахинд жүдо бөхийг жигд хүртээмжтэй  хөгжүүлэх, олон төсөл хөтөлбөрийг хэргэжүүлдэг билээ. Түүний нэг хэсэгт нь Монгол Улсын жүдо бөхөөр хичээллэх боломж нөхцөл тааруу байгаа хөдөө орон нутгийн аймаг, сумдын хүүхэд, багачуудад чиглэсэн төсөл хөтөлбөр байдаг.

     “IJF” буюу Олон улсын жүдо бөхийн холбооноос Хөвсгөл аймагт хэрэгжүүлсэн төсөл хөтөлбөр амжилттай хэрэгжиж, Хөвсгөлийн хүүхдүүд, жүдогийн татами, дэвжээ, жүдогийн өмсгөл, жүдогитой болж байлаа. Тус хөтөлбөрт хамрагдаж “IJF”-ийн Nicolas Messner-ээс жүдоги гардан авч байсан охин  Б.Баасанхүү  олимпын мөнгөн медаль, дэлхийн аваргын алтан медаль хүртсэн билээ.

     Харин тэгвэл Дархан-Уул аймагт хэрэгжсэн “IJF” төсөл мөн л амжилттай хэрэгжсэн байна. Олон улсын жүдо бөхийн холбооны хэвлэлийн албаны дарга Nicolas Messner-ээс жүдоги өмсгөл авч байсан бяцхан хүү Кадербекийн Ёолк өнөөдөр дэлхийн аваргаас хүрэл медаль хүртлээ.