“Нүүдэлчин” дэлхийн соёлын фестивалийг дөрөв дэх жилдээ 2025 оны наймдугаар сарын 21-24-ний өдрүүдэд Тайж хайрханы бэлд зохион байгуулахаар төлөвлөж байна. Ажлын хэсгийн хурлаар фестивалийн хүрээнд зохион байгуулах үйл ажиллагаа, ерөнхий төлөвлөгөө, дэд ажлын хэсгүүдийн уялдаа холбоо, зохион байгуулалтыг сайжруулах талаар санал солилцлоо. Энэ удаагийн фестивалийн онцлох үйл ажиллагаанууд гэвэл “Нүүдэлчдийн ертөнц, өнгөрсөн ба ирээдүй” олон улсын эрдэм шинжилгээний хурал болно.

     Жуулчдад зориулсан үндэсний болон орон нутгийн онцлог бүхий “хоолны гудамж” талбайн тохижилттой “camping area”-г байгуулна. Фестивалийн ажлын хэсгийн хуралдаанаар Монгол Улсын шилдэг өвлөн уламжлагчдын үндэсний жагсаалтыг шинэчлэн батлах,108 өвлөн уламжлагч, Соёлын бүтээлч үйлдвэрлэлийн үзэсгэлэн, худалдаа , олон нийтэд зориулсан “медиа арт” үзэсгэлэн, бүтээлүүдийн талаар хэлэлцэв.

    Энэ удаагийн фестивалийг соёлын өвийг хамгаалах хуулийн дагуу соёлын биет бус өвийг хадгалж хамгаалах, түүнийг өвлөн уламжлагчийг тодруулах, алдаршуулах, авьяас билгийг хөгжүүлэх, олон нийтэд сурталчлан, түгээн дэлгэрүүлэх зорилгоор олон улсын хэмжээнд зохион байгуулж буйгаараа  онцлог юм.