Жүдо бөхийн дэлхийн аварга шалгаруулах тэмцээний өмнөх өдөр 2025 оны зургадугаар сарын 11-ний өдөр  Унгар Улсын нийслэл Будапешт хотноо Олон улсын жүдо бөхийн холбоо (IJF)-ны конгресс зохион байгуулагдав.

“IJF”-ийн гишүүн 180 гаруй орны төлөөлөл оролцсон нэгдсэн хуралдаанаар гишүүдийн олонхийн дэмжлэгээр ноён Мариус Визерийг ирэх дөрвөн жилд Олон улсын жүдо бөхийн холбооны ерөнхийлөгчөөр сонгогдлоо.

Мөн тус хурлаар 2026, 2027, 2028 онуудад ДАШТ-г зохион байгуулах улсуудыг танилцуулсан ба “2028 оны Лос Анжелес”-н олимпын жилд зохиогдох ДАШТ-ийг Бахрейн Улсад зохион байгуулахаар хэлэлцээрийн түвшинд явж буй. Мөн тамирчдын дэлхийн чансааг тооцох, олимпын чансааг тооцоолох журмыг танилцуулав.

      ОУЖБХ-д 177 улсын 10 291 тамирчин чансааны оноотой яваа бөгөөд үүнээс 372 тамирчинд Лос Анжелесын олимпын оноо олгогдох ажээ. Түүнчлэн шүүгчдийн ерөнхий зөвлөлөөс олон улсын шүүгчдийг бэлтгэх сургалтын тухай ба өнгөрсөн хоёр жилийн ажлын дүгнэлт тайлангаа танилцуулав.  Тив тус бүр мөн адил өнгөрсөн хоёр жилийн ажлын дүгнэлт, тайлангуудаа хэлэлцэв. Мөн ОУЖБХ-ны чухал хэсэг болох Санхүүгийн хэлтэс ажлын тайлангаа илтгэсэн байна.  Дэлхий даяар жүдо бөхийг хөгжүүлэх, дасгалжуулагч, тамирчдыг тэтгэлэгт хөтөлбөрт хамрагдуулах талаар ярьлаа. Жүдо бөх сул хөгжсөн орнуудад дэвжээ байгуулахад туслалцаа үзүүлэх гэх мэт ажлуудыг идэвхитэй зохион байгуулж тив тус бүрийн нэгдсэн холбоодууд ба улс орнуудын холбоодтой нягт харилцаатай хамтран ажиллахаа илэрхийлэв.

      Энэхүү өндөр түвшний уулзалтад Монгол Улсыг төлөөлөн Монголын жүдо бөхийн холбооны ерөнхий нарийн бичгийн дарга Б.Батгэрэл, Үндэсний шигшээ багийн менежер Г.Болор нар оролцлоо.