Азийн волейболын холбооноос зохион байгуулж буй “AVC Nations Cup 2025” тэмцээн Вьетнамын Ханой хотод болж байна. Өнөөдөр “В” хэсгийн сүүлийн тоглолтод Монголын эмэгтэй шигшээ баг Иран Улсын багтай тоглож 3:2-оор буулган авч, эхний ялалтаа авч чадлаа. Манай баг, Иран Улсын багийг 25:18, 21:25, 14:25, 25:21, 15:11-ээр тавын үеийн тоглолтод 3:2-оор хожсон байна.

    Манай баг тус тэмцээний эхний дөрвөн тоглолтод дараалан хожигдоод байсан билээ. Энэ жилийн анхны олон улсын тэмцээнд хүчтэй багуудтай оноолт таарсан Монголын баг эхний хожлоо авч одоогоор Шинэ Зеландын багийн урд гурван оноотой бичигдлээ.

    “В” хэсгээс Филиппин, Казахстан Улсын багууд шалгарч хагас шигшээд өрсөлдөх эрхийг авсан. Мөн Иран, Индонезийн багууд 5-8-р байрын төлөө тоглох эрхтэй боллоо. Харин Монголын баг 9-11-р байрын төлөө тоглохоор болж байна.

     “А” хэсгийн Энэтхэг -Тайвань, Вьетнам, Австралийн багуудын тоглолтын дараа манай багийн өрсөлдөгч баг тодорно.  Ханой хотод болж буй “AVC Nations Cup 2025” тэмцээнд 11 баг өрсөлдөж байгаагаас хэсгийн сүүлийн тоглолтууд өнөөдөр болж хагас шигшээ болон 5-8-р байрын төлөө тоглох багуудын нэрс бүрэн тодорно.