Чөлөөт бөхийн Азийн аваргын мөнгөн медальт, Батхуягийн Анударь 2004 оны энэ өдөр Улаанбаатар хотын Багануур дүүрэгт мэндэлжээ. Тэрбээр Багануур дүүргийн “Боловсрол” цогцолбор дунд сургуулийг төгссөн. ДАШТ-ий мөнгөн медальт, ОУХМ Б.Хулангийн төрсөн дүү бөгөөд, эгчийнхээ бэлтгэл хангагч болж, хамтдаа амжилтаа ахиулсаар байгаа билээ.

      Б.Анударь чөлөөт бөхийн “Бишкек-2024” Ази тивийн аварга шалгаруулах тэмцээний 59 кг-ын жингийн аваргын алтан медалийн төлөө Хятадын Жан Гитай өрсөлдөж, мөнгөн медаль хүртэж байлаа.

      2024 оны насанд хүрэгчдийн УАШТ-ий 59 кг-ын жингийн аваргын төлөөх барилдаанд Б.Анударь, армийн ДАШТ-ий хүрэл медальт Б.Болор-Эрдэнийг 7:5-аар хожиж  УАШТ-д анх удаа түрүүлж байв. Харин түүний эгч ОУХМ Б.Хулан 53 кг-д түрүүлсэн билээ. Эгч, дүүс УАШТ-д нэг өдөр түрүүлсэн  тэр мөч УАШТ-д анх удаа тохиож байлаа. Б.Анударь 2022 онд залуучуудын УАШТ-ээс хүрэл медаль, 2024 онд “U-23” ангиллын УАШТ-ээс алт, 2024 оны насанд хүрэгчдийн УАШТ-ээс алтан медаль хүртэж байв.